കാലടി: പൊലീസ് ഉദ്യോഗസ്ഥരുടെ അംഗബലക്കുറവ് കാലടി പൊലീസ് സ്റ്റേഷന്റെ ദൈനംദിന പ്രവർത്തനങ്ങളെ കാര്യമായി ബാധിക്കുന്നു. ആവശ്യമായ അംഗബലമില്ലാത്തതിനാൽ നിത്യചുമതലകൾ സമയബന്ധിതമായി പൂർത്തിയാക്കാൻ ഉദ്യോഗസ്ഥർ ബുദ്ധിമുട്ടുകയാണ്. വിവിധ മേഖലകളിലെ ചുമതലകൾ ഒരേസമയം നിർവഹിക്കേണ്ടി വരുന്നതിനാൽ നിലവിലുള്ള പൊലീസ് ഉദ്യോഗസ്ഥർക്ക് അധിക ജോലിഭാരവും ഉണ്ടാകുന്നുണ്ട്.
കാലടി പൊലീസ് സ്റ്റേഷനിൽ 60 ഉദ്യോഗസ്ഥരാണ് ആവശ്യമായിട്ടുള്ളത്. എന്നാൽ നിലവിൽ 12 പേരുടെ കുറവാണ് ഉള്ളത്. ഇതിനു പിന്നാലെയാണ് കഴിഞ്ഞ ദിവസം ഒരു ഗ്രേഡ് എസ്.ഐ ഉൾപ്പെടെ നാല് പൊലീസ് ഉദ്യോഗസ്ഥരെ സസ്പെൻഡ് ചെയ്തത്. നേരത്തേ തന്നെ അംഗബലം കുറവായിരുന്ന സ്റ്റേഷനിൽ നാല് ഉദ്യോഗസ്ഥരുടെ സേവനം കൂടി നഷ്ടമായത് പ്രവർത്തനത്തെ കൂടുതൽ ബാധിക്കുമെന്ന ആശങ്കയിലാണ് പൊലീസ് ഉദ്യോഗസ്ഥർ.
പൊതുവേ പൊലീസ് സേനയിൽ അംഗബലക്കുറവ് നിലനിൽക്കുന്നതിനാൽ സസ്പെൻഡ് ചെയ്ത ഉദ്യോഗസ്ഥർക്ക് പകരം ഉടൻ മറ്റുള്ളവരെ നിയമിക്കാനുള്ള സാധ്യതയും കുറവാണ്. പകരം ജീവനക്കാരെ ലഭിക്കാതെ വന്നാൽ നിലവിലുള്ള ഉദ്യോഗസ്ഥർക്ക് കൂടുതൽ ചുമതല ഏറ്റെടുക്കേണ്ട സാഹചര്യമുണ്ടാകും.
സി.ഐ ഓഫിസ് വരുമ്പോൾ വീണ്ടും കുറയും
കാലടിയിൽ സർക്കിൾ ഇൻസ്പെക്ടർ ഓഫിസ് പ്രവർത്തനം ആരംഭിക്കുന്നതോടെ നിലവിലുള്ള അംഗബലത്തിൽ നിന്ന് അഞ്ച് ഉദ്യോഗസ്ഥരെങ്കിലും പുതിയ ഓഫീസിലേക്ക് മാറ്റേണ്ടിവരും. ഇതോടെ കാലടി പൊലീസ് സ്റ്റേഷനിലെ അംഗബലം വീണ്ടും കുറയും. സി.ഐ ഓഫിസിന്റെ പ്രവർത്തനത്തിനായി ഒരു പൊലീസ് വാഹനവും വിട്ടുനൽകേണ്ട സാഹചര്യമുണ്ട്.
സ്റ്റേഷന്റെ ദൈനംദിന പ്രവർത്തനങ്ങൾക്കു പുറമേ പുതിയ ഓഫീസിന്റെ ചുമതലകൾ കൂടി വരുന്നതോടെ നിലവിലെ ജീവനക്കാരുടെ ജോലിഭാരം വർധിക്കുമെന്നും പൊലീസ് ഉദ്യോഗസ്ഥർ ചൂണ്ടിക്കാട്ടുന്നു.
വനിതാ പൊലീസിനും ക്ഷാമം
കാലടി പൊലീസ് സ്റ്റേഷനിൽ വനിതാ പൊലീസ് ഉദ്യോഗസ്ഥരുടെ എണ്ണത്തിലും കുറവുണ്ട്. വനിതകൾ ഉൾപ്പെടുന്ന സമരങ്ങളും പ്രതിഷേധങ്ങളും മറ്റ് നിയമസംരക്ഷണ ചുമതലകളും വരുമ്പോൾ സമീപത്തെ മറ്റ് പൊലീസ് സ്റ്റേഷനുകളിൽനിന്ന് വനിതാ ഉദ്യോഗസ്ഥരെ വിളിച്ചുവരുത്തേണ്ട സാഹചര്യമാണ് നിലവിലുള്ളത്.
ഇത് അടിയന്തര സാഹചര്യങ്ങളിൽ കാലതാമസത്തിനും മറ്റ് സ്റ്റേഷനുകളിലെ ഉദ്യോഗസ്ഥരുടെ അധിക ജോലിഭാരത്തിനും കാരണമാകുന്നുണ്ട്.
ഗതാഗതക്കുരുക്കും പൊലീസിന്റെ തലയിൽ
കാലടിയിലും സമീപപ്രദേശമായ മറ്റൂരിലും ഗതാഗതക്കുരുക്ക് രൂക്ഷമാകുമ്പോഴും പൊലീസ് ഉദ്യോഗസ്ഥർ ഇടപെടേണ്ടിവരുന്നു. ട്രാഫിക് നിയന്ത്രണം പൊലീസിന്റെ പ്രധാന ചുമതലകളിൽ ഉൾപ്പെടുന്നതല്ലെന്ന് പറയുമ്പോഴും പ്രത്യേക ട്രാഫിക് സംവിധാനങ്ങളുടെ അഭാവം കാരണം പൊലീസ് തന്നെ റോഡിലിറങ്ങി ഗതാഗതം നിയന്ത്രിക്കേണ്ട സ്ഥിതിയാണ്.
ഗതാഗതക്കുരുക്ക് പരിഹരിക്കാൻ ഉദ്യോഗസ്ഥർ റോഡിൽ നിലയുറപ്പിക്കുമ്പോൾ അതിനനുസരിച്ച് സ്റ്റേഷനിലെ മറ്റ് ചുമതലകൾ വൈകുകയും ചെയ്യും. എന്നാൽ ഇത്തരം കാലതാമസത്തിനും പലപ്പോഴും പൊലീസ് ഉദ്യോഗസ്ഥർ തന്നെ പഴി കേൾക്കേണ്ടിവരുന്ന സ്ഥിതിയാണുള്ളത്.
പ്രമുഖരുടെ യാത്രയ്ക്കും പൊലീസ് ഡ്യൂട്ടി
പ്രമുഖ വ്യക്തികൾ കാലടി വഴി കടന്നുപോകുമ്പോഴും പൊലീസ് ഉദ്യോഗസ്ഥർക്ക് ഏറെ നേരം റോഡിൽ ഡ്യൂട്ടിക്ക് നിൽക്കേണ്ടിവരുന്നു. സുരക്ഷാ ക്രമീകരണങ്ങളുടെ ഭാഗമായി പ്രധാന റോഡുകളിലും ജംഗ്ഷനുകളിലും ഉദ്യോഗസ്ഥരെ വിന്യസിക്കേണ്ടിവരുന്നത് സ്റ്റേഷനിലെ ലഭ്യമായ അംഗബലം വീണ്ടും കുറയ്ക്കുന്നു.
ഇത്തരത്തിൽ വിവിധ ചുമതലകൾക്കായി ഉദ്യോഗസ്ഥരെ പുറത്തേക്ക് വിന്യസിക്കുമ്പോൾ സ്റ്റേഷനിൽ അവശേഷിക്കുന്നവരുടെ ജോലിഭാരം വർധിക്കുന്നു. കേസുകളുടെ അന്വേഷണം, പരാതികൾ പരിശോധിക്കൽ, പട്രോളിങ്, ക്രമസമാധാന പാലനം, കോടതിയുമായി ബന്ധപ്പെട്ട ജോലികൾ തുടങ്ങി നിരവധി ചുമതലകൾ ഒരേസമയം നിർവഹിക്കേണ്ടിവരുന്നതിനാൽ പ്രവർത്തനങ്ങൾ വൈകുന്ന സാഹചര്യമുണ്ടാകുന്നു.
അംഗബലം വർധിപ്പിക്കണമെന്ന ആവശ്യം
പൊലീസ് സ്റ്റേഷന്റെ സുഗമമായ പ്രവർത്തനത്തിന് ആവശ്യമായ അംഗബലം ഉറപ്പാക്കണമെന്ന ആവശ്യം ശക്തമാകുകയാണ്. നിലവിലുള്ള 12 പേരുടെ കുറവ് പരിഹരിക്കുന്നതിനൊപ്പം സസ്പെൻഷൻ മൂലം ഉണ്ടായ ഒഴിവുകളും നികത്തണമെന്നാണ് ആവശ്യം.
അതോടൊപ്പം വനിതാ പൊലീസ് ഉദ്യോഗസ്ഥരുടെ എണ്ണം വർധിപ്പിക്കുകയും ഗതാഗത നിയന്ത്രണത്തിന് പ്രത്യേക സംവിധാനം ഏർപ്പെടുത്തുകയും ചെയ്താൽ സ്റ്റേഷനിലെ ഉദ്യോഗസ്ഥരുടെ അധിക ജോലിഭാരം കുറയ്ക്കാൻ കഴിയുമെന്നും ചൂണ്ടിക്കാണിക്കപ്പെടുന്നു.
