കാലടി: ശ്രീ ശാരദ സൈനിക് സ്കൂൾ ആതിഥേയത്വം വഹിച്ച സിബിഎസ്ഇ ക്ലസ്റ്റർ ലെവൽ ഇന്റർ-സ്കൂൾ ആൺകുട്ടികളുടെ ഫുട്ബോൾ ചാമ്പ്യൻഷിപ്പ് സമാപിച്ചു. അണ്ടർ-14, അണ്ടർ-17, അണ്ടർ-19 വിഭാഗങ്ങളിലായാണ് മത്സരങ്ങൾ നടന്നത്. അണ്ടർ-14 വിഭാഗത്തിൽ പീസ് പബ്ലിക് സ്കൂൾ എറണാകുളം, നേവി ചിൽഡ്രൻസ് സ്കൂൾ കൊച്ചിയെ 4–3ന് പരാജയപ്പെടുത്തി. അണ്ടർ-17 വിഭാഗത്തിൽ നേവി ചിൽഡ്രൻസ് സ്കൂൾ കൊച്ചി, ഭവൻസ് എളമക്കരയെ 1-0 ന് പരാജയപ്പെടുത്തി. അണ്ടർ-19 വിഭാഗത്തിൽ മാർത്തോമ പബ്ലിക് സ്കൂൾ കാക്കനാട്, മാതാ സീനിയർ സെക്കൻഡറി സ്കൂൾ തുമ്പോളിയെ 6–5ന് തോൽപ്പിച്ചു.
അണ്ടർ-17 വിഭാഗത്തിൽ വിജയികളായ നേവി ചിൽഡ്രൻസ് സ്കൂൾ
വിജയികൾക്ക് ആദി ശങ്കര ഗ്രൂപ്പ് ഓഫ് ഇൻസ്റ്റിറ്റിയൂഷൻസ് സിഇഒ ഡോ. എം. രാമസ്വാമി സമ്മാനങ്ങൾ വിതരണം ചെയ്തു. സിഒഒ സ്ക്വാഡ്രൺ ലീഡർ ആർ. ശങ്കര സുബ്രഹ്മണ്യൻ, ചീഫ് ഫിനാൻഷ്യൽ ഓഫീസർ എം. എ. ശ്രീനിവാസ , ശ്രീ ശാരദ സൈനിക് സ്കൂൾ പ്രിൻസിപ്പൽ ഡോ. ദീപാ ചന്ദ്രൻ, സിബിഎസ്ഇ ഒബ്സർവർ പി.വി. അഭിജിത്ത് എന്നിവർ ചടങ്ങിൽ പങ്കെടുത്തു.
അണ്ടർ-14 വിഭാഗത്തിൽ വിജയികളായ പീസ് പബ്ലിക് സ്കൂൾ എറണാകുളം
തിരുവനന്തപുരം മുതൽ എറണാകുളം വരെയുള്ള ജില്ലകളിൽ നിന്നായി 170 സ്കൂളുകൾ ചാമ്പ്യൻഷിപ്പിൽ പങ്കെടുത്തു. കാലടി ശ്രീ ശങ്കര കോളേജ് ഗ്രൗണ്ട്, കളമശ്ശേരി ഫാക്ട് ഗ്രൗണ്ട് എന്നിവിടങ്ങളിലായാണ് മത്സരങ്ങൾ നടന്നത്.
