പറവൂർ: വ്യാജ ആധാർ കാർഡുപയോഗിച്ച് കേരളത്തിലെത്തിയ 27 ബംഗ്ലാദേശികൾ പിടിയിൽ. വടക്കൻ പറവൂരിൽ നിന്നാണ് ഇവർ പിടിയിലാകുന്നത്. ഇവിടുത്തെ ഒരുവീട്ടിൽ ഒരുമിച്ച് താമസിച്ച് വരികയായിരുന്നു. വെള്ളിയാഴ്ച പുലർച്ചെ രണ്ടോടെയാണ് സംഘം പിടിയിലാകുന്നത്.
നേരത്തെ, സമാനമായ രീതിയിൽ ഏഴ് ബംഗ്ലാദേശികൾ പിടിയിലായിരുന്നു. എറണാകുളം റൂറലിൽ നിന്നായിരുന്നു ഇവരെ പിടികൂടയിത്. എന്നാൽ, ഇത്രയധികംപേർ ഒന്നിച്ച് പിടിയിലാകുന്നത് ആശങ്കയുയർത്തിയിട്ടുണ്ട്. രഹസ്യവിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ഇവർ പിടിയിലായത്. എ.ടി.എസ്സും പോലീസും ചേർന്നാണ് ഇവരെ വലയിലാക്കിയത്.
മൂന്ന് മാസത്തിന് മുമ്പ് ഇവിടെ എത്തിയവരാണ് എന്നാണ് ഇവർ നൽകിയ മൊഴി. എന്നാൽ, ഇത് വിശ്വസിക്കാൻ പോലീസ് തയ്യാറായിട്ടില്ല. വിഷയത്തിൽ, വിശദമായ അന്വേഷണമുണ്ടാകുമെന്നും പോലീസ് അറിയിച്ചു. ഇത്രയുംപേർ ഒന്നിച്ച് താമസിക്കുന്നത് രാജ്യസുരക്ഷയെ തന്നെ ബാധിക്കുന്ന വിഷയമാണെന്നാണ് വിലയിരുത്തൽ. ഇവർ എങ്ങിനെയാണ് കേരളത്തിലെത്തിയതെന്നും ആരാണ് താമസസൗകര്യം ഒരുക്കിയതെന്നും പോലീസ് പരിശോധിക്കുന്നുണ്ട്.
