കാഞ്ഞൂർ: കാഞ്ഞൂർ പഞ്ചായത്തിലെ കോഴിക്കാടൻപടി ദേശത്ത് ഐപ്പാടൻ പാപ്പച്ചൻ മകൻ ലിജോ (49) ബാങ്ക് ലോൺ റവന്യൂ റിക്കവറി ആയതിനെ തുടർന്നു ജീവനൊടുക്കി. സ്വന്തമായി പന്തൽ പ്രസ്ഥാനം ഉണ്ടായിരുന്നെങ്കിലും പ്രധാന തൊഴിൽ കാർഷികവൃത്തിയായിരുന്നു. ശ്രീമൂലനഗരം – കാഞ്ഞൂർ ഗ്രാമപഞ്ചായത്തുകളിലെ വിവിധ സ്ഥലങ്ങൾ പാട്ടത്തിനെടുത്ത് വർഷങ്ങളായി കപ്പയും, പയറും, വാഴയും തുടങ്ങി വിവിധ കാർഷികവൃത്തി ലോണെടുത്ത് നടത്തിവരികയായിരുന്നു. ഓരോ കാലവർഷക്കെടുതിയിലും, കാലാവസ്ഥ വ്യതിയാനത്തിലും ഭീമമായ നഷ്ടം ഉണ്ടാകാറുണ്ടെങ്കിലും പരമാവധി കടം വാങ്ങിയും, ലോണെടുത്തും ഉപജീവനമാർഗമായ കാർഷികവൃത്തിയെ കൈവിടാതെ മുന്നോട്ടു കൊണ്ട് പോകുകയായിരുന്നു.
അടുത്തിടെയായി ലോണെടുത്ത ബാങ്കിൽ നിന്നും കടുത്ത സമ്മർദ്ദം ലോൺ തിരിച്ചടവിലും കുടിശ്ശികയിലും ഉണ്ടാവുകയും, തിരിച്ചെടുക്കാൻ നിവൃത്തിയില്ലാത്ത സാഹചര്യം വന്നതോടെ ബാങ്ക് റവന്യൂ റിക്കവറി പുറപ്പെടുവിക്കുകയും ചെയ്തിരുന്നു. മക്കളുടെ വിദ്യാഭ്യാസത്തിന്റെ ഭാരിച്ച ചെലവും, ബാങ്ക് ബാധ്യതയും, പുറമേ നിന്നുള്ള വായ്പകളും, ജീവിതത്തിന്റെ താളം തെറ്റിക്കുന്ന അവസ്ഥ വന്നപ്പോഴാണ് വീട്ടിൽ തന്നെ തൂങ്ങി നിൽക്കുന്ന അവസ്ഥയിൽ കണ്ടത്. പരമാവധി വേഗം ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംസ്കാരം കാഞ്ഞൂർ സെന്റ് മേരീസ് ഫൊറോന പള്ളി സെമിത്തേരിയിൽ വ്യാഴാഴ്ച 3 30 ന് നടക്കും. ഭാര്യ : പുളിയനം താഴുങ്ങ കുടുംബാംഗം ഷിമി, മക്കൾ: സാനിയ, സാന്ദ്രാ, സാവിയോ .
