അങ്കമാലി: അങ്കമാലി അങ്ങാടിക്കടവ് റോഡിൽ നാല് കിലോ കഞ്ചാവുമായി രണ്ട് പശ്ചിമ ബംഗാൾ സ്വദേശികളെ എക്സൈസ് സംഘം അറസ്റ്റ് ചെയ്തു. മുഷിദാബാദ് സ്വദേശികളായ ഹബിബുർ റഹ്മാൻ മണ്ഡൽ (55), ഹബിബുർ റഹ്മാൻ (37) എന്നിവരാണ് പിടിയിലായത്. തിങ്കളാഴ്ച രാവിലെ 10.30ഓടെയായിരുന്നു സംഭവം.
തൃശൂർ, ആലുവ റെയിൽവേ സ്റ്റേഷനുകളിലെ പരിശോധന ഒഴിവാക്കുന്നതിനായി പ്രതികൾ തിരൂർ റെയിൽവേ സ്റ്റേഷനിൽ ഇറങ്ങിയ ശേഷം യൂബർ ടാക്സിയിൽ അങ്കമാലിയിലെത്തുകയായിരുന്നു. തുടർന്ന് താമസസ്ഥലത്തേക്ക് പോകുന്നതിനിടെയാണ് എക്സൈസ് സംഘം ഇവരെ പിടികൂടിയത്.അങ്കമാലി മേഖലയിലെ ഇതര സംസ്ഥാന തൊഴിലാളികൾക്കിടയിൽ വിൽപ്പന നടത്തുന്നതിനായാണ് കഞ്ചാവ് കൊണ്ടുവന്നതെന്ന് ചോദ്യം ചെയ്യലിൽ പ്രതികൾ സമ്മതിച്ചതായി എക്സൈസ് അറിയിച്ചു.
അങ്കമാലി എക്സൈസ് ഇൻസ്പെക്ടർ വിപിൻദാസിന്റെ നേതൃത്വത്തിലാണ് പരിശോധനയും അറസ്റ്റും നടന്നത്. അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) ബിജു പി.കെ., സുരേഷ് ബാബു പി.എൻ., പ്രിവന്റീവ് ഓഫീസർ ഷിബു എം.എ., പ്രിവന്റീവ് ഓഫീസർ (ഗ്രേഡ്) ജോമോൻ കെ.യു., സിവിൽ എക്സൈസ് ഓഫീസർമാരായ അജീഷ് മോഹൻ, നൗഫൽ എസ്., സിവിൽ എക്സൈസ് ഓഫീസർ ഡ്രൈവർ സജീഷ് പി.ബി. എന്നിവർ സംഘത്തിലുണ്ടായിരുന്നു.
സംഭവത്തിൽ എക്സൈസ് കേസ് രജിസ്റ്റർ ചെയ്ത് തുടർനടപടികൾ ആരംഭിച്ചു.
