കാലടി: ഏപ്രിൽ 5 മുതൽ 12 വരെ തിരുവൈരാണിക്കുളം കൈലാസം വെൽനസ് പാർക്കിൽ നടക്കുന്ന മൂന്നാമത് തിരുവൈരാണിക്കുളം ഫെസ്റ്റിന് ഞായറാഴ്ച്ച തുടക്കമാകും. വൈകീട്ട് 6 നടക്കുന്ന കൊച്ചിൻ കൈരളിയുടെ സൂപ്പർ ഹിറ്റ് ഗാനമേളയോടെയാണ് ഫസ്റ്റിന് തുടക്കമാകുന്നത്. അമ്യൂസ്മെൻറ് പാർക്ക്, ഗെയിം സോൺ, വിവിധ കലാപരിപാടികൾ, വ്യാപാരമേള, ഭക്ഷ്യമേള, സാംസ്കാരിക സദസുകൾ, തുടങ്ങിയവ ഫെസ്റ്റിന്റെ ഭാഗമായി ഉണ്ടാകും.
വൈകീട്ട് 6.30 മുതർ രാത്രി 10 വരെ പ്രത്യേകം തയ്യാറാക്കിയ വേദിയിൽ വിവിധ കലാപരിപാടികൾ അരങ്ങേറും. പ്രദേശികമായ കലാകരൻമാരുടെയും കലാകാരികളുടെയും പരിപാടികൾക്കാണ് മുൻഗണന നൽകിയിരിക്കുന്നത്. ഒപ്പന, മാർഗ്ഗംകളി, കൈക്കൊട്ടിക്കളി, ശാസ്ത്രീയ നൃത്തം, സിനിമാറ്റിക് ഡാൻസ്, ലഘു നാടകം, സംഗീതശില്പം തുടങ്ങിയ വിവിധങ്ങളായ കലാപരിപാടികൾ അരങ്ങേറും. കുട്ടികൾക്ക് ആഘോഷിക്കാൻ പാർക്കും ഒരുക്കിയിട്ടുണ്ട്.
ഫെസ്റ്റിനോടനുബന്ധിച്ച് മെഗാ നറുക്കെടുപ്പും, ദിവസവും ഫെസ്റ്റിൽ സമ്മാനക്കൂപ്പൺ നറുക്കെടുപ്പും ഉണ്ട്. സമാപന ദിവസമായ ഏപ്രിൽ 12 ന് കണ്ണൂർ അഥീനയുടെ നാടൻപാട്ട് നടക്കും. വിപുലമായ വാഹന പാർക്കിങ്ങ് സൗകര്യം ഏർപ്പെടുത്തിയിട്ടുണ്ട്. സുരക്ഷക്കായി സിസിടിവി ക്യാമറകളും സുരക്ഷാ ജീവനക്കാരുടെ സേവനവും ഉണ്ട്.
തിരുവൈരാണിക്കുളം മഹാദേവ ക്ഷേത്രട്രസ്റ്റിന്റെ നേതൃത്വത്തിൽ ശ്രീമൂലനഗരം, കാഞ്ഞൂർ, വാഴക്കുളം പഞ്ചായത്തുകളുടെയും വിവിധ സാംസ്കാരിക സംഘടനകളുടെയും സ്ഥാപനങ്ങളുടെയും സഹകരണത്തോടെയാണ് ഫെസ്റ്റ് നടത്തുന്നത്. ഫെസ്റ്റിന് മുന്നോടിയായി മാരത്തോൺ മത്സരം സംഘടിപ്പിച്ചിരുന്നു. സംസ്ഥാനത്തിന്റെ വിവിധ ഭാഗങ്ങളിൽ നിന്നായി നിരവധി പേരാണ് മാരത്തോണിൽ പങ്കെടുത്തത്.
