അങ്കമാലി: വോട്ടെണ്ണലിന് മുന്നേ തന്നെ കോൺഗ്രസിലെ മുഖ്യമന്ത്രി കസേരക്കായുള്ള വടംവലി ശക്തമാകുന്നുവെന്ന സൂചനക്കിടെ കെസി വേണുഗോപാലിനെ പുകഴ്ത്തി റോജി എം ജോൺ. എ.ഐ.സി.സി ജനറൽ സെക്രട്ടറിയായ കെ.സി. വേണുഗോപാലിന്റെ നേതൃത്വഗുണങ്ങളെ പ്രശംസിച്ച് റോജി എം ജോൺ ഫേസ്ബുക്കിൽ കുറിപ്പ് പങ്കുവച്ചു
കെ.സി രാജ്യം മുഴുവൻ പാർട്ടിക്ക് വേണ്ടി രാവും പകലും ഇല്ലാതെ പണി എടുക്കുന്ന നേതാവാണെന്നും, സംഘ പരിവാറിന് എതിരായ പോരാട്ടത്തിൽ രാഹുൽ ഗാന്ധിയോടൊപ്പം മുന്നിൽ നിന്ന് നയിക്കുന്ന ചങ്കുറപ്പുള്ള നേതാവാണെന്നും ഫേസ്ബുക്കിൽ കുറിപ്പിൽ പറയുന്നു. നേരത്തെ കെ സുധാകരനും കെ സി വേണുഗോപാലിനെ പുകഴ്ത്തി ഫേസ്ബുക്കിൽ കുറിപ്പിട്ടിരുന്നു.
കെ.സിയോടും, രാഹുൽ ഗാന്ധിയോടും അടുപ്പമുളള റോജി എം ജോൺ കെ.സി വേണുഗോപാലിനെ പുകഴ്ത്തിയിരിക്കുന്നത് ഏറെ ചർച്ചയായിട്ടുണ്ട്.
.
റോജി എം ജോണിന്റെ ഫേസ്ബുക്ക് കുറിപ്പ്
ഇന്നലെ മീഡിയ വണ്ണിലെ ഒരു ചർച്ച കാണാൻ ഇടയായി. തിരഞ്ഞെടുപ്പ് ഫലം വരും മുൻപ് അടുത്ത മുഖ്യമന്ത്രി ആരായിരിക്കും എന്ന് ചർച്ച ചെയ്യാനുള്ള അവകാശം എല്ലാവർക്കും ഉണ്ട്. എന്തായാലും UDF അധികാരത്തിൽ വരും എന്ന കണക്കുകൂട്ടലിൽ ആണല്ലോ കോൺഗ്രസ് മുഖ്യമന്ത്രി ആരായിരിക്കും എന്ന ചർച്ചകൾ.
ഒരു ജനാധിപത്യ പ്രസ്ഥാനമായ ആയ കോൺഗ്രസിൽ എല്ലാ കാലത്തും മുഖ്യമന്ത്രി സ്ഥാനത്തിന് യോഗ്യരായ ഒന്നിലധികം നേതാക്കൾ ഉണ്ടാവും. അതിൽ നിന്നും ഒരാളെ പാർട്ടിയുടെ ദേശീയ നേതൃത്വം വ്യവസ്ഥാപിതമായ രീതിയിൽ തിരഞ്ഞെടുക്കും. അതിനുള്ള സംവിധാനം പാർട്ടിക്ക് ഉണ്ട്. അത് ചാനൽ മുറികളിലും, സോഷ്യൽ മീഡിയയിലും ചിലർ നടത്തുന്ന ചർച്ചകൾ നോക്കി അല്ല.
ഇത് എഴുതാൻ കാരണം, മേൽ സൂചിപ്പിച്ച ചർച്ചയുടെ മറവിൽ കോൺഗ്രസിൻ്റെ സമുന്നത നേതാവായ K C വേണുഗോപാലിൻ്റെ യോഗ്യത അളക്കാൻ മീഡിയ വൺ നടത്തിയ ശ്രമം ആണ്. കോൺഗ്രസിൻ്റെ സംഘടനാ ചുമതല ഉള്ള ജനറൽ സെക്രട്ടറി എന്ന നിലയിൽ രാജ്യം മുഴുവൻ പാർട്ടിക്ക് വേണ്ടി രാവും പകലും ഇല്ലാതെ പണി എടുക്കുന്ന നേതാവാണ് അദ്ദേഹം. സംഘ പരിവാറിന് എതിരായ പോരാട്ടത്തിൽ രാഹുൽ ഗാന്ധിയോടൊപ്പം മുന്നിൽ നിന്ന് നയിക്കുന്ന ചങ്കുറപ്പുള്ള നേതാവ്. പാർട്ടി അധികാരത്തിൻ്റെ സൗകര്യങ്ങളിൽ ഇരുന്നപ്പോൾ അല്ല അദ്ദേഹം ഇതിൻ്റെ നേതൃത്വത്തിലേക്ക് വന്നത്, മറിച്ച് നിരവധി തെരഞ്ഞെടുപ്പുകളിൽ പരാജയപ്പെട്ട് പ്രതിപക്ഷത്ത് നിൽക്കുമ്പോഴാണ്. അതുകൊണ്ട് അദ്ദേഹത്തിൻ്റെ യോഗ്യത അളക്കാനും കോൺഗ്രസിൽ അഭിപ്രായ വ്യത്യാസങ്ങൾ ഉണ്ട് എന്ന് വരുത്തി തീർക്കാനും ആരും ശ്രമിക്കണ്ട. ഇത്തരം ചർച്ചകൾ കോൺഗ്രസിനെ നന്നാക്കാൻ അല്ല എന്ന് ആർക്കും മനസിലാവും
