പെരുമ്പാവൂർ: പെരുമ്പാവൂർ പാത്തിപ്പാലം ജംഗ്ഷന് സമീപം ബ്രൗൺഷുഗർ വില്പന നടത്തിയ അതിഥി തൊഴിലാളിയെ കുന്നത്തുനാട് എക്സൈസ് അറസ്റ്റ് ചെയ്തു. അസാം സ്വദേശി ഉമർ അലി ആണ് പിടിയിലായത്. ഉച്ചയ്ക്ക് 11.30ന് ആയിരുന്നു സംഭവം. ഈ പ്രദേശത്ത് ഒരു ചെറിയ ബോക്സിൽ കൊണ്ടുവന്ന ബ്രൗൺഷുഗർ വില്പനയ്ക്ക് ശ്രമിച്ച പ്രതിയെ നാട്ടുകാർ ചേർന്ന് തടഞ്ഞുവെച്ചു. പിന്നീട് എക്സൈസിനെ വിവരമറിയിച്ചു.
നാട്ടുകാർ പിടികൂടാൻ ശ്രമിക്കുന്നതിനിടെ ഇയാൾ കൈവശമുണ്ടായിരുന്ന ബ്രൗൺഷുഗറിന്റെ ഭൂരിഭാഗവും എവിടെയോ എറിഞ്ഞു കളഞ്ഞു എന്നാണ് പറയുന്നത്. അതിനാൽ ഉദ്യോഗസ്ഥർക്ക് ഇയാളുടെ കൈവശത്തു നിന്നും വളരെ കുറച്ച് അളവിലുള്ള ബ്രൗൺഷുഗർ മാത്രമാണ് ലഭിച്ചത്. എന്നാൽ മലയാളിയായ ഒരാളാണ് തന്നെ ഇത് ഏൽപ്പിച്ചത് എന്ന് പ്രതി എക്സൈസ് ഉദ്യോഗസ്ഥരോട് പറഞ്ഞു. പ്രദേശത്തെ വ്യാപാരസ്ഥാപനങ്ങളിലെ സിസിടിവി കേന്ദ്രീകരിച്ച്, പ്രതിക്ക് ബ്രൗൺഷുഗർ നൽകിയ മലയാളിയെക്കുറിച്ചുള്ള അന്വേഷണം ഉദ്യോഗസ്ഥർ ഊർജിതമാക്കി.
