നെടുമ്പാശ്ശേരി: ബിസിനസിൽ പങ്കാളിയാക്കാമെന്നു പറഞ്ഞ് കോടികൾ തട്ടിയ കേസിൽ ഒരാൾ പിടിയിൽ. പെരുമ്പാവൂർ കോടനാട് കുറിച്ചിലക്കോട് ഗീതാഗോവിന്ദത്തിൽ രാജേഷ് ബി മേനോൻ (48) നെയാണ് നെടുമ്പാശേരി പോലീസ് പിടികൂടിയത്. നെടുമ്പാശേരി സ്വദേശിയെ ബിസിനസിൽ പങ്കാളിയാക്കാമെന്ന് 35 ലക്ഷം രൂപ ഇയാൾ കൈക്കലാക്കുകയായിരുന്നു.
കോടനാട് സ്വദേശി ചാർളിയെ കബളിപ്പിച്ച് 9 ലക്ഷം രൂപ തട്ടിയെടുത്ത കേസിലും, കാലടി സ്വദേശി പോളിനെ പറ്റിച്ച് 11ലക്ഷം രൂപ കൈക്കലാക്കിയ കേസിലും, ജെയ്ബി കുര്യൻ എന്നയാളിൽ നിന്ന് 44 ലക്ഷം രൂപ തടിയെടുത്ത കേസിലും,കലൂർ സ്വദേശിനിയിൽ നിന്ന് 44 ലക്ഷം രൂപ പറ്റിച്ചെടുത്ത കേസിലും, കോടനാട് സ്വദേശി പോളിനെ വിശ്വാസവഞ്ചന ചെയ്ത് 2 ലക്ഷം തട്ടിയ കേസിലും ഇയാൾ പ്രതിയാണ്. കോടനാട് ഫോറസ്റ്റ് റേഞ്ചിലും രാജേഷിനെതിരെ കേസുണ്ട്. കുറെ നാളായി പ്രതിഒളിവിലായിരുന്നു.
കൂടുതൽ പേർ തട്ടിപ്പിനിരയായിട്ടുണ്ടെന്നാണ് പ്രാഥമിക അന്വേഷണത്തിൽ നിന്ന് ലഭ്യമാകുന്ന വിവരം. ഇൻസ്പെക്ടർ ബി.കെ അരുൺ, എ.എസ്. ഐമാരായ രാജേഷ് കുമാർ. റോണി അഗസ്റ്റിൻ എന്നിവർ ചേർന്നാണ് പ്രതിയെ പിടികൂടിയത്. പോലീസ് അന്വേഷണം വ്യാപിപ്പിച്ചു.
