കോതമംഗലം : ഇടമലയാറിൽ മൂന്ന് വിദ്യാർഥികൾ മുങ്ങിമരിച്ചു. തിരുവല്ല സ്വദേശി ബിയോൺ, തിരുവനന്തപുരം സ്വദേശി ഹരീഷ്, കോട്ടയം സ്വദേശി അതുൽ എന്നിവരാണ് മരിച്ചത്. മൂവരും കോതമംഗലം ബസേലിയസ് ഡെൻറൽ കോളജിലെ മൂന്നാം വർഷ വിദ്യാർത്ഥികളാണ്. പൊലീസും അഗ്നിരക്ഷാ സേനയും സ്ഥലത്തെത്തി മൃതദേഹം പുറത്തെടുത്ത് ബസേലിയോസ് ആശുപത്രിയിലെത്തിച്ചു.
രാവിലെ ഒമ്പത് പേരടങ്ങുന്ന സംഘം പലവൻപടിപുഴയിൽ കുളിക്കാനിറങ്ങിയതാണ്. ഇവരിൽ മൂന്ന് പേർ ഒഴുക്കിൽ പെടുകയായിരുന്നു. വനത്തോടു ചേർന്നുള്ള പ്രദേശമാണ്. വൈദ്യുതോൽപ്പാദനത്തിന് ശേഷം വെള്ളം തുറന്നു വിടുന്നതിനാൽ നല്ല ഒഴുക്കുള്ള പ്രദേശമാണ്. ഒറ്റപ്പെട്ട പ്രദേശമായതിനാൽ അപകടവിവരം വൈകിയാണ് പുറത്തറിഞ്ഞത്. അപകട സാധ്യത മുന്നറിയിപ്പ് ബോർഡുകൾ സ്ഥാപിച്ചിട്ടുണ്ടെങ്കിലും കാര്യമാക്കാതെ പലരും ഇവിടെ ഇറങ്ങാറുണ്ടെന്ന് പറയുന്നു.
