അങ്കമാലി നിയോജകമണ്ഡലത്തിലെ 3 പദ്ധികള്‍ക്കായി 6.25 കോടി രൂപ ബജറ്റില്‍ വകയിരുത്തി. അങ്കമാലി താലൂക്ക് ആശുപത്രിയില്‍ നിലവില്‍ നബാര്‍ഡിന്‍റെ സഹായത്തോടെ 6.30 കോടി രൂപ ചെലവഴിച്ച് ആറ് നിലകളിലായി നിര്‍മ്മിക്കുന്ന ബഹുനില കെട്ടിടത്തിന്‍റെ നിര്‍മ്മാണം പുരോഗമിക്കുകയാണ്. ഇതിന്‍റെ പൂര്‍ത്തീകരണത്തിനായി 2 കോടി രൂപയാണ് ബജറ്റില്‍ വകയിരുത്തിയിട്ടുള്ളത്. അങ്കമാലിയിലെ സുപ്രധാന റോഡായ മൂക്കന്നൂര്‍-തുറവൂര്‍ റോഡ് ആധുനിക നിലവാരത്തില്‍ നിര്‍മ്മിക്കുക എന്നത് വളരെ നാളുകളായുള്ള ജനങ്ങളുടെ ആവശ്യമായിരുന്നു ഇതിനായി 2.25 കോടി രൂപയാണ് വകയിരുത്തിയിട്ടുള്ളത്. നിയോജകമണ്ഡലത്തിലെ പ്രധാനപ്പെട്ട റോഡുകള്‍ ബി.എം & ബി.സി നിലവാരത്തില്‍ നിര്‍മ്മിക്കുന്ന പദ്ധതിയുടെ ഭാഗമായിട്ടാണ് മൂക്കന്നൂര്‍-തുറവൂര്‍ റോഡ് ഉള്‍പ്പെടെ പ്രധാനപ്പെട്ട പൊതുമരാമത്ത് റോഡുകളുടെ ശുപാര്‍ശ എം.എല്‍.എ ധനകാര്യ മന്ത്രിക്ക് നല്‍കിയത്. മലയാറ്റൂര്‍- മണപ്പാട്ട് ചിറയില്‍ ടൂറിസം വികസനത്തിനായി 2 കോടി വകയിരുത്തി. വര്‍ഷം മുഴുവന്‍ നിരവധി ടൂറിസ്റ്റുകളാണ് ഇവിടെ എത്തിച്ചേരുന്നത്. ഇവരെ ആകര്‍ഷിക്കുന്നതിനായുള്ള ടൂറിസം വികസന പദ്ധതിക്കായാണ് തുക ബജറ്റില്‍ വകയിരുത്തിയിരിക്കുന്നത്.
എന്നാല്‍ അങ്കമാലി നിയോജകമണ്ഡലത്തിലെ പ്രധാനപ്പെട്ട ആവശ്യങ്ങള്‍ അവഗണിച്ച ഒരു ബജറ്റാണിതെന്ന് റോജി എം. ജോണ്‍ എം.എല്‍.എ ചൂണ്ടിക്കാണിച്ചു. അങ്കമാലി ബൈപ്പാസ് ഉള്‍പ്പെടെയുള്ള നിയോജകമണ്ഡലത്തിലെ പ്രധാന പദ്ധതികള്‍ക്ക് ഭൂമി ഏറ്റെടുക്കുന്നതിനും മറ്റുമായി ആവശ്യമായ തുക അനുവദിക്കുന്നതില്‍ സര്‍ക്കാര്‍ തികഞ്ഞ അലംഭാവമാണ് കാണിച്ചിരിക്കുന്നത്. നിയോജകമണ്ഡലത്തിലെ നിരവധിയായ റോഡുകള്‍, പാലങ്ങള്‍, ജലസേചന, കുടിവെള്ള, ടൂറിസം പദ്ധതികള്‍, കാര്‍ഷിക മേഖലയിലെ വികസന പ്രവര്‍ത്തികള്‍ ഉള്‍പ്പെടെ പ്രധാനപ്പെട്ട 20 പ്രവര്‍ത്തികള്‍ക്ക് തുക അനുവദിക്കുന്നതിന് ശുപാര്‍ശ സമര്‍പ്പിച്ചിരുന്നുവെങ്കിലും കേവലം 3 പദ്ധതികള്‍ക്ക് മാത്രം നാമമാത്രമായ തുകയാണ് അനുവദിച്ചിരിക്കുന്നതെന്നും ഇതിനെതിരെ ശക്തമായ പ്രതിഷേധം നിയമസഭയില്‍ ഉന്നയിക്കുമെന്നും റോജി എം. ജോണ്‍ എം.എല്‍.എ കൂട്ടിച്ചേര്‍ത്തു.
