കാലടി : സ്വാമി ആഗമാനന്ദ സ്മൃതികള്‍ ഉണര്‍ത്തിയ ‘വന്ദേപദം സ്വാമി ആഗമാനന്ദ’ എന്ന നൃത്തസംഗീതാര്‍ച്ചന കാലടിക്കാര്‍ക്ക് ആത്മനിര്‍വൃതി പകര്‍ന്ന ദൃശ്യവിരുന്നായി കാലടി ശ്രീരാമകൃഷ്ണ അദ്വൈതാശ്രമത്തിലെ അന്താരാഷ്ട്ര സര്‍വ്വമത ക്ഷേത്രത്തിന്റെ സുവര്‍ണ്ണജൂബിലിയുടെ സമാപന ദിവസമാണ് നൃത്താര്‍ച്ചന അരങ്ങേറിയത്. കാലടി ആശ്രമ സ്ഥാപകനും ഹൈന്ദവ നവോത്ഥാന നായകനും സാമൂഹ്യ പരിഷ്‌കര്‍ത്താവുമായ ആഗമാനന്ദ സ്വാമികളുടെ കര്‍മ്മ ജീവിതത്തിലെ പ്രധാന സംഭവങ്ങള്‍ കോര്‍ത്തിണക്കി കാലടി ശ്രീശാരദാംബ ഡാന്‍സ് അക്കാദമി ഡയറക്ടര്‍ ഡോ. ശ്രീലക്ഷ്മി സനീഷാണ് വന്ദേപദം സ്വാമി ആഗമാനന്ദയ്ക്ക് നൃത്തഭാഷ്യം ഒരുക്കിയത്.
ശ്രീമദ് ആഗമാനന്ദ സ്വാമികള്‍ കാലടിയില്‍ ആശ്രമം സ്ഥാപിച്ചതും, സംസ്‌കൃത ഭാഷാ പരിപോഷണത്തിന് ബ്രഹ്‌മവിദ്യാലയം സ്ഥാപിച്ചതും ദളിതരെ വേദവും പൂജയും പഠിപ്പിച്ചതും, സാമൂഹിക വിദ്യാഭ്യാസ രംഗത്ത് സ്വാമികള്‍ വരുത്തിയ വിപ്ലവകരമായ മാറ്റങ്ങളും, സര്‍വ്വമത സമഭാവനയുടെ സന്ദേശവും അദ്വൈതമത പ്രചാരണവും ശ്രീശങ്കര ജന്മഭൂമിയുടെ ഉദ്ധാരണത്തിനായി സ്വാമികള്‍ അനുഷ്ഠിച്ച ത്യാഗങ്ങളും എല്ലാം നൃത്തരൂപത്തില്‍ വിഷയങ്ങളായി.
അരമണിക്കൂര്‍ നീണ്ട ഭരതനാട്യ നൃത്താര്‍ച്ചനയ്ക്ക് ഡോ. ശ്രീലക്ഷ്മി സനീഷ്, ദേവഗംഗ സനീഷ്, ഗോപിക, ആദിത്യ അനില്‍കുമാര്‍, അഞ്ജലി കൃഷ്ണ, രേവതി സുരേഷ്, ഗൗരി സുഭാഷ്, പാര്‍വതി സുരേഷ് എന്നീ കലാകാരികള്‍ ജീവന്‍ പകര്‍ന്നു.
എസ്. വിജയന്‍ കാലടി രചനയും എം.എസ് ഉണ്ണികൃഷ്ണന്‍ സംഗീതവും നല്‍കി. സങ്കുചിത മതബോധങ്ങള്‍ മനുഷ്യക്കുരിതിയലേക്ക് മാറുന്ന കാലഘട്ടത്തില്‍ സമഭാവനയുടെ സന്ദേശം പകരുന്ന സര്‍വ്വമത ക്ഷേത്രാങ്കണത്തില്‍ നടന്ന വന്ദേപദം സ്വാമി ആഗമാനന്ദ നൃത്താര്‍ച്ചന ശ്രദ്ധേയമായി.
