കാലടി: മലയാറ്റൂർ-നീലീശ്വരം പഞ്ചായത്തിലെ കണ്ണിമംഗലത്ത് വീണ്ടും പുലി ഇറങ്ങിയതായി സംശയം. കുന്നേവെളിയിൽ രമണന്റെ വീട്ടിലെ കാളയെയും പശുക്കിടാവിനെയും അജ്ഞാത ജീവി കടിച്ചുകൊന്നു. പുലിയാണെന്ന നിഗമനത്തിലാണ് നാട്ടുകാർ. ഇവയുടെ മാംസം കുറെ ഭാഗം ഭക്ഷിച്ചിട്ടുണ്ട്. ബാക്കി ഉപേക്ഷിച്ചു പോയ നിലയിലാണ്. ജനവാസ മേഖല കൂടിയാണ് ഇവിടം. നേരത്തേയും ഇവിടെ പുലിയെന്നു കരുതുന്ന അജ്ഞാത ജീവി വളർത്തു മൃഗങ്ങളെ കൊന്നു തിന്നിരുന്നു. അതിനാൽ പുലിയുടെ സാന്നിധ്യം വനത്തിന്റെ സമീപ ഭാഗത്ത് തന്നെ ഉണ്ടെന്ന ഭീതിയിലാണ് നാട്ടുകാർ. രാത്രി വീട്ടിൽ നിന്നു പുറത്തിറങ്ങാൻ വീട്ടുകാർ ഭയക്കുന്നു.
കാട്ടാന ശല്ല്യവും രൂക്ഷമായ പ്രദേശം കൂടിയാണ് ഇവിടം. കാട്ടാനക്കൂട്ടം പ്രദേ കാർഷിക വിളകൾ നശിപ്പിച്ചിരുന്നു. റബർ, തെങ്ങ്, വാഴ എന്നിവയാണ് കൂടുതലും നശിച്ചത്. പുലിയെ പിടിക്കാൻ വേണ്ടനടപടികൾ സ്വീകരിക്കണമെന്നും, പട്രോളിങ് ശക്തമാക്കണമെന്നുമാണ് നാട്ടുകാരുടെ ആവശ്യം.
