കാലടി: എപിജെ അബ്ദുൽകലാം കേരള ടെക്‌നോളജിക്കൽ യൂണിവേഴ്‌സിറ്റിയുടെ മികച്ച എൻ എസ് എസ് വോളന്റിയർ ആയി കാലടി ആദിശങ്കര എൻജിനീയറിങ് കോളജിലെ എ. ഗൗരി തിരഞ്ഞെടുക്കപ്പെട്ടു. വോളന്റിയർ സെക്രട്ടറി എന്ന നിലയിൽ കോളജിലെ എൻ എസ് എസ് യൂണിറ്റിന്റെ ആഭിമുഖ്യത്തിൽ നടപ്പിലാക്കിയ വിവിധ സാമൂഹിക ക്ഷേമപ്രവർത്തനങ്ങൾ ക്ക് നൽകിയ നേതൃത്വമാണ് ഈ നേട്ടത്തിന് അർഹയാക്കിയത്.
വയനാട്ടിൽ വച്ച് നടന്ന ദേശീയോദ്ഗ്രഥന ക്യാമ്പിൽ കേരളത്തെ പ്രതിനിധീകരിച്ചിരുന്നു. മികച്ച യൂണിറ്റിനും, പ്രോഗ്രാം ഓഫീസറിനും ഉള്ള ദേശീയ പുരസ്‌കാരം നേടിയതാണ് ആദിശങ്കരയിലെ എൻ എസ് എസ് യൂണിറ്റ്. തുടർച്ചയായ മൂന്നാം വർഷമാണ് മികച്ച എൻ എസ് എസ് വോളന്റിയർമാർക്കുള്ള സർവകലാശാല പുരസ്‌കാരം കരസ്ഥമാക്കുന്നത്. രണ്ടു വർഷം തുടർച്ചായി സംസ്ഥാന സർക്കാരിന്റെ മികച്ച യൂണിറ്റ്, പ്രോഗ്രാം ഓഫീസർ, വോളണ്ടിയർമാർ എന്നീ പുരസ്‌കാരങ്ങൾ നേടിയിട്ടുണ്ട്.
സർവകലാശാലയിൽ നിന്നും ഈ വർഷവും ഗൗരി സംസ്ഥാന എൻ എസ് എസ് പുരസ്‌കാരത്തിനായി നാമനിർദേശം ചെയ്യപ്പെട്ടിട്ടുമുണ്ട്. മാവേലിക്കര സ്വദേശിനി ആയ ഗൗരി എൻ. വി പവിത്രന്റെയും അജിതയുടെയും മകളാണ്. അവസാന വർഷ കമ്പ്യൂട്ടർ സയൻസ് ആൻഡ് ആർട്ടിഫിഷ്യൽ ഇന്റലിജൻസ് വിഭാഗം വിദ്യാർത്ഥിനിയാണ്‌.
