ആലുവ: 164 ദിവസം നീണ്ട ആശുപത്രി വാസം…അതിൽ 129 ദിവസവും തീവ്ര പരിചരണ വിഭാഗത്തിൽ….. ഒടുവിൽ ആരോഗ്യം വീണ്ടെടുത്ത് 14 വയസ്സുകാരി ഫാദിയ മടങ്ങുമ്പോൾ രാജഗിരി ആശുപത്രി പീഡിയാട്രിക് വിഭാഗത്തിനും ഇത് അഭിമാന നിമിഷം.
കഴിഞ്ഞ മാർച്ച് എട്ടിനാണ് പനി, ചുമ, അനിയന്ത്രിതമായ വിയർപ്പ് എന്നീ ലക്ഷണങ്ങളുമായി ഫാദിയയെ ആലുവ രാജഗിരി ആശുപത്രിയിൽ പ്രവേശിപ്പിക്കുന്നത്. അത്യാഹിത വിഭാഗത്തിൽ നടത്തിയ പരിശോധനയിൽ ഫാദിയയുടെ ശരീരത്തിൽ സോഡിയത്തിന്റെ അളവ് വളരെ കുറഞ്ഞതായി കണ്ടെത്തി. ശരാശരി 135 എങ്കിലും വേണ്ട സ്ഥാനത്ത് ഫാദിയക്ക് ഉണ്ടായിരുന്നത് 109 മാത്രമായിരുന്നു. ഫാദിയയുടെ നില വഷളാകുന്നത് കണ്ടതോടെ ഉടൻ തന്നെ കുട്ടികളുടെ തീവ്ര പരിചരണ വിഭാഗത്തിലേക്ക് മാറ്റി.
രക്തത്തിലെ ഓക്സിജന്റെ കുറവ്, മൾട്ടി ഡ്രഗ് റെസിസ്റ്റൻസ് രോഗാണുക്കളുടെ സാന്നിധ്യം എന്നിവ കണ്ടെത്തിയതോടെ വെന്റിലേറ്റർ പിന്തുണയിലായിരുന്നു ഫാദിയ. കുട്ടികളുടെ തീവ്ര പരിചരണ വിഭാഗം മേധാവി ഡോ. സൌമ്യ മേരി തോമസിന്റെ നേതൃത്വത്തിൽ നടത്തിയ പരിശോധനയിൽ ആൻ്റി ഫോസ്‌ഫോളിപ്പിഡ് സിൻഡ്രോം എന്ന അപൂർവ്വ രോഗമാണെന്ന് കണ്ടെത്തി. സ്വന്തം രോഗപ്രതിരോധ സംവിധാനം ആരോഗ്യമുള്ള കോശങ്ങളെ തെറ്റായി ആക്രമിക്കുന്നതാണ് ഈ രോഗാവസ്ഥക്ക് കാരണം. രോഗപ്രതിരോധ സംവിധാനം നിർമ്മിക്കുന്ന ഈ ആൻ്റിബോഡികൾ ധമനികളിലും സിരകളിലും രക്തം കട്ടപിടിക്കാൻ കാരണമാകും.
ഫാദിയയുടെ വലത് കാലിൽ രക്തം കട്ട പിടിച്ചതോടെ ചലന ശേഷിയേയും ബാധിച്ചു. ഇമ്മ്യൂണോഗ്ലോബുലിൻ നൽകിയും ആന്റി ബയോട്ടിക് വഴി അണുബാധ നിയന്ത്രിച്ചും, രക്തകട്ടകൾ അലിയിച്ചും ഡോക്ടർമാർ ഫാദിയയെ സാവധാനം തിരികെ ജീവിതത്തിലേക്ക് കൊണ്ട് വന്നു. പീഡിയാട്രിക് ന്യൂറോളജി, പീഡിയാട്രിക് ഹെമറ്റോളജി, പീഡിയാട്രിക് സർജറി, ഇൻ്റർവെൻഷണൽ റേഡിയോളജി, റുമാറ്റോളജി, പൾമോണോളജി എന്നീ വിഭാഗങ്ങളിലെ ഡോക്ടർമാർ ചേർന്ന് പ്രത്യേക മെഡിക്കൽ സംഘത്തെ രൂപീകരിച്ചായിരുന്നു ചികിത്സ.
കുട്ടികളുടെ തീവ്ര പരിചരണ വിഭാഗത്തിലെ നഴ്സുമാരുടെ പരിചരണവും, പിന്തുണയും നിർണായകമായെന്ന് ഡോ. സൌമ്യ പറഞ്ഞു. ഫാദിയക്ക് ഇഷ്ട്ടമുളള പാട്ടുകൾ കേൾപ്പിച്ചും, സുറുമ എഴുതി കൊടുത്തും നഴ്സുമാർ കൂടെ നിന്നു. ട്രക്കിയോസ്റ്റമി ട്യൂബുകൾ നീക്കം ചെയ്തതോടെ റൂമിലേക്ക് മാറ്റിയ ഫാദിയയെ തുടർന്ന് ചികിത്സിച്ചത് ശിശുരോഗ വിഭാഗത്തിലെ ഡോ. ദീപ്തി ദാമോദരനായിരുന്നു. രണ്ട് മാസം നീണ്ട പരിശ്രമത്തിനൊടുവിൽ ഫിസിയോ തെറാപ്പി വിഭാഗത്തിന്റെ കൂടി പിന്തുണയോടെ ഫാദിയയുടെ ചലന ശേഷി വീണ്ടെത്തു.
മകളെ നഷ്ടപ്പെടുമെന്ന് കരുതിയ അവസ്ഥയിൽ നിന്നും തിരികെ കിട്ടിയ സന്തോഷം ഡോക്ടർമാർക്കും, നഴ്സുമാർക്കുമൊപ്പം കേക്ക് മുറിച്ചാണ് കുടുംബം ആഘോഷിച്ചത്.
