ആലുവ: ദേശീയ പോലീസ് മീറ്റിൽ കേരളാ പോലീസിന്‍റെ യശസുയർത്തിയ പഞ്ചഗുസ്തി താരത്തിന് റൂറൽ ജില്ലാ പോലീസ് മേധാവി ഡോ.വൈഭവ് സക്‌സേനയുടെ അഭിനന്ദനം. കോടനാട് പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസർ കെ.എസ്.വൈശാഖിനെയാണ് ജില്ലാ പോലീസ് ആസ്ഥാനത്ത് വച്ച് അഭിനന്ദിച്ചത്. ഹരിയാനയിൽ നടന്ന ദേശീയ പോലീസ് മീറ്റിൽ രാജ്യത്തെ പ്രശസ്തരായ 25 ഓളം പഞ്ചഗുസ്തി താരങ്ങളോട് മത്സരിച്ചാണ് വെങ്കല മെഡൽ നേടിയത്. അറുപത് കിലോ കാറ്റഗറിയിലാണ് ഹരിയാന, പഞ്ചാബ്, മണിപ്പൂർ തുടങ്ങിയ സംസ്ഥാനങ്ങളിലെ പഞ്ചഗുസ്തി മത്സരാർത്ഥികളോട് പൊരുതി മെഡൽ സ്വന്തമാക്കിയത്.
കഴിഞ്ഞ 14 ന് എറണാകുളത്ത് നടന്ന മുപ്പത്തിയഞ്ച് വയസിന് മുകളിലുള്ള അറുപത് കിലോ കാറ്റഗറിയിൽ വെള്ളിമെഡലും ഇദ്ദേഹം കരസ്ഥമാക്കിയിരുന്നു. സ്വന്തമായി തയ്യാറാക്കിയ ഉപകരണങ്ങളിൽ ദിവസവും മൂന്നു മണിക്കൂറോളം പരിശീലനം നടത്തും. എട്ടു വർഷം കമാൻഡോ ആയിരുന്നു. പുതിയ മത്സരങ്ങളിൽ പങ്കെടുക്കുവാനുള്ള തയാറെടുപ്പിലാണ് വൈശാഖ്. എല്ലാ പിന്തുണയും സഹകരണവും എസ്.പി ഡോ.വൈഭവ് സക്സേന വാഗ്ദാനം ചെയ്തു.
