അങ്കമാലി: യുവാക്കളിൽ കായികക്ഷമതയും കായിക സംസ്കാരവും വളർത്തിയെടുക്കുവാനും ലഹരിക്കെതിരായ പ്രതിരോധം തീർക്കുവാനുമായി അങ്കമാലി നിയോജകമണ്ഡലത്തിൽ വിവിധങ്ങളായിട്ടുള്ള കായിക പരിപാടികൾ സംഘടിപ്പിക്കുന്നതിന്റെ ആദ്യഘട്ടമെന്ന നിലയിൽ സംഘടിപ്പിച്ച ‘എം.എൽ.എ കപ്പ് 2കെ23’ യുടെ ഉദ്ഘാടനം പ്രശസ്ത ഫുട്ബോൾ താരം സി.കെ.വിനീത് നിർവ്വഹിച്ചു. റോജി എം. ജോൺ എം.എൽ.എ അദ്ധ്യക്ഷത വഹിച്ചു. അങ്കമാലി സെൻറ്. ജോസഫ് സ്കൂൾ ഗ്രൗണ്ടിൽ വച്ച് നടക്കുന്ന ആദ്യദിന മൽസരത്തിൽ 6 മൽസരങ്ങളിലായി 12 ടീമുകൾ മാറ്റുരച്ചു. അങ്കമാലി നിയോജകമണ്ഡലത്തിൽ സ്ഥിരതാമസക്കാരായ 15 നും 35 നും ഇടയിൽ പ്രായമുള്ള യുവാക്കളുടെ 32 ടീമുകളാണ് ടൂർണ്ണമെൻറിൻ പങ്കെടുക്കുന്നത്. ഡിസംബർ 21 നാണ് ടൂർണ്ണമെൻറിൻറെ ഫൈനൽ.
ചടങ്ങിൽ നഗരസഭാ ചെയർമാൻ മാത്യു തോമസ്, വൈസ് ചെയർപേഴ്സൺ റീത്താ പോൾ, വിവിധ പഞ്ചായത്ത് പ്രസിഡൻറുമാരായ ലതിക ശശികുമാർ, വിൽസൻ കോയിക്കര, ഷൈജൻ തോട്ടപ്പിള്ളി, ത്രിതല പഞ്ചായത്ത് ജനപ്രതിനിധികൾ, കലാ-കായിക രംഗത്തെ പ്രമുഖ വ്യക്തികൾ, വിവിധ രാഷ്ട്രീയ കക്ഷിനേതാക്കൾ എന്നിവർ സന്നിഹിതരായിരുന്നു
