കാലടി: തനത് കലകളുടെ ഏറ്റവും മികച്ച മഹോത്സവമായി മാറിക്കൊണ്ടിരിക്കുന്ന കാലടിയിൽ നടക്കുന്ന അന്തർദേശീയ ശ്രീശങ്കര നൃത്ത സംഗീതോത്സവം ഓരോ ദിവസവും ജനപ്രിയ കലാരൂപങ്ങളെക്കൊണ്ട് ശ്രദ്ധേയമാകുന്നു. നാലാമത് അന്തർദ്ദേശീയ ഫെസ്റ്റിവലിന്റെ വേദി , സൗകര്യങ്ങൾ കൊണ്ടും സമ്പന്നമാണ്. നാലാം ദിവസത്തെ കലാപരിപാടികൾ ഗ്രൂപ്പിനങ്ങളോടെ ആരംഭിച്ചു. കൾച്ചറൽ അംബാസഡർ നിരഞ്ജന മേനോന്റെ നൃത്ത പരിപാടി വേറിട്ട അവതരണമായിരുന്നു.
ഒഡീഷ്യയുടെ തനത് കലാരൂപമായ ഒഡീസി യുവകലാകാരൻ രുദ്ര പ്രസാദും യുവകലാകാരി അനന്യ പരീദയും ചേർന്ന് സമ്പന്നമാക്കി. ചാർട്ടേർഡ് അക്കൗണ്ടൻ്റ് കൂടിയായ ബാംഗ്ളൂരിൽ നിന്നുള്ള ഭാനുപ്രിയ രാകേഷിന്റെ ഭരതനാട്യം അടവുകൾ കൊണ്ടും അഭിനയം കൊണ്ടും ശ്രദ്ധേയമായിരുന്നു. മുംബൈയിൽ നിന്നുള്ള മോഹിനിയാട്ടം നർത്തകി മഹാലക്ഷ്മി അനൂപിന്റെ നൃത്തം ലാസ്യം മനോഹരമായിരുന്നു.
ശ്രീശങ്കര നാട്യ മണ്ഡപത്തിൽ ഹവായിയൻ നൃത്തമായ ഹുലയുടെ സോദാഹരണ പ്രഭാഷണം നടന്നു. ബുധനാഴ്ച വൈകിട്ട് 4 മണിക്ക് ഗ്രൂപ്പിനങ്ങൾ, 5 മണിക്ക് കൾച്ചറൽ അംബാസഡർ രേഷ്മ പി. ബി. യുടെ ഭരതനാട്യം, 6 മണിക്ക് ഹുല ഡാൻസും മോഹിനിയാട്ടവും, 6. 30 ന് ആനന്ദ് സി എസ്. ൻ്റെ ഭരതനാട്യം, 7 മണിക്ക് അരുണരേഖ വാരണാസിയുടെ കുച്ചുപ്പുടി, തുടർന്ന് ഗ്രൂപ്പിനങ്ങൾ.
