ന്യൂഡല്ഹി: പതിനൊന്നുവയസ്സുകാരനെ വീട്ടില്ക്കയറി കൊലപ്പെടുത്തിയ സംഭവത്തില് യുവതി അറസ്റ്റില്. കുട്ടിയുടെ പിതാവിന്റെ പെണ്സുഹൃത്തും ഡല്ഹി സ്വദേശിയുമായ പൂജ കുമാരി(24)യെയാണ് പോലീസ് പിടികൂടിയത്. ആണ്സുഹൃത്തിനെ വിവാഹം കഴിക്കാന് കുട്ടി തടസ്സമാകുമെന്ന് കരുതിയാണ് യുവതി കൃത്യം നടത്തിയതെന്നും നൂറുകണക്കിന് സിസിടിവി ദൃശ്യങ്ങള് പരിശോധിച്ചശേഷമാണ് ഒളിവിലായിരുന്ന പ്രതിയെ പിടികൂടിയതെന്നും പോലീസ് പറഞ്ഞു.
കൊല്ലപ്പെട്ട 11-കാരന്റെ പിതാവായ ജിതേന്ദ്രയും പ്രതി പൂജാ കുമാരിയും നേരത്തെ ഒരുമിച്ച് താമസിച്ചവരാണെന്നാണ് പോലീസ് പറയുന്നത്. വിവാഹിതനായ ജിതേന്ദ്രയും പൂജാ കുമാരിയും നേരത്തെ അടുപ്പത്തിലായിരുന്നു. 2019 മുതല് ഇരുവരും ഒരുമിച്ച് താമസം തുടങ്ങി. എന്നാല്, മൂന്നുവര്ഷത്തിന് ശേഷം ജിതേന്ദ്ര പൂജാ കുമാരിയെ ഉപേക്ഷിച്ച് ഭാര്യയുടെ അടുത്തേക്ക് മടങ്ങി. തുടര്ന്ന് ഇന്ദ്രപുരിയില് ഭാര്യയ്ക്കും മകനും ഒപ്പമായിരുന്നു ഇയാളുടെ താമസം.
സംഭവത്തില് അന്വേഷണം നടത്തിയ പോലീസ് സംഘം പരിസരത്തെ സിസിടിവി ദൃശ്യങ്ങളില്നിന്ന് പ്രതിയെ തിരിച്ചറിഞ്ഞു. എന്നാല്, യുവതി സ്ഥിരമായി ഒരിടത്തും താമസിക്കാത്തത് അന്വേഷണത്തില് വെല്ലുവിളിയായി. രണ്ഹോല, നിഹാര്വിഹാര്, റിഷാല് ഗാര്ഡന്, നജഫ്ഘട്ട് എന്നിവിടങ്ങളിലെ മുന്നൂറോളം സിസിടിവി ദൃശ്യങ്ങള് പരിശോധിച്ചതോടെയാണ് പ്രതി നഗരംവിട്ട് പോയിട്ടില്ലെന്ന് പോലീസ് സ്ഥിരീകരിച്ചത്. ഡല്ഹിയിലെ വിവിധ ഒളിയിടങ്ങളില് മാറിമാറി കഴിഞ്ഞിരുന്ന പ്രതിയെ ഒടുവില് സംഭവം നടന്ന് മൂന്നുദിവസത്തിന് ശേഷം പോലീസ് പിടികൂടുകയായിരുന്നു.
