തിരുവൈരാണിക്കുളളം കൈലാസം വെൽനസ് പാർക്കിൽ നടക്കുന്ന തിരുവൈരാണിക്കുളം ഫെസ്റ്റിൽ ഓരോ ദിവസവും കഴിയുന്തോറും തിരക്ക് വർധിച്ചു വരുന്നു. ദൂരെ സ്ഥലങ്ങളിൽ നിന്നുപോലും നിരവധി പേരാണ് ഫെസ്റ്റ് ആസ്വദിക്കാൻ എത്തുന്നത്. തിരുവൈരാണിക്കുളം മഹാദേവ ക്ഷേത്രട്രസ്റ്റിന്റെ നേതൃത്വത്തിൽ ശ്രീമൂലനഗരം, കാഞ്ഞൂർ, വാഴക്കുളം പഞ്ചായത്തുകളുടെയും വിവിധ സാംസ്‌കാരിക സംഘടനകളുടെയും സ്ഥാപനങ്ങളുടെയും സഹകരണത്തോടെയാണ് ഫെസ്റ്റ് നടത്തുന്നത്.
അമ്യൂസ്മെൻറ് പാർക്ക്, ഗെയിം സോൺ, വിവിധ കലാപരിപാടികൾ, വ്യാപാരമേള, ഭക്ഷ്യമേള, സാംസ്‌കാരിക സദസുകൾ, തുടങ്ങിയവ ഫെസ്റ്റിന്റെ ഭാഗമായി ഉണ്ട്. വൈകീട്ട് 6.30 മുതർ രാത്രി 10 വരെ പ്രത്യേകം തയ്യാറാക്കിയ വേദിയിൽ പ്രദേശികമായ കലാകരൻമാരുടെയും കലാകാരികളുടെയും വിവിധ കലാപരിപാടികളാണ് അരങ്ങേറുന്നത്. ഒപ്പന, മാർഗ്ഗംകളി, കൈക്കൊട്ടിക്കളി, ശാസ്ത്രീയ നൃത്തം, സിനിമാറ്റിക് ഡാൻസ്, ലഘു നാടകം, സംഗീതശില്പം തുടങ്ങിയ പരിപാടികളാണ് നടക്കുന്നത്.
കലാകാരന്മാരുടെ കലാപരിപാടികൾ ഈ സമയം മുഴുവനും നടക്കും കണ്ടും കേട്ടും ആസ്വദിച്ചിരിക്കാൻ കസേരകളും ബെഞ്ചുകളുമുണ്ട്. ഇതേ സമയം കുട്ടികൾക്ക് ആഘോഷിക്കാൻ മൈതാനത്തിന്റെ ഒരു ഭാഗത്ത് ചിൽഡ്രൻസ് പാർക്കും, അമ്യൂസ്മെൻറ് പാർക്കുമുണ്ട് മാതാ പിതാക്കൾക്കൊപ്പം വരുന്ന കുട്ടികൾ നേരെ ഇവിടേക്കാണ് ഓടുന്നത്. മൈതാനത്തിന്റെ പല ഭാഗങ്ങളിലായി ഭക്ഷണശാലകളും കച്ചവട സിഥാപനങ്ങളുമുണ്ട്.
ഫെസ്റ്റിനോടനുബന്ധിച്ച് മെഗാ നറുക്കെടുപ്പും, ദിവസവും ഫെസ്റ്റിൽ സമ്മാനക്കൂപ്പൺ നറുക്കെടുപ്പും ഉണ്ട്. സമാപന ദിവസമായ ഞായറാഴ്ച്ച കണ്ണൂർ അഥീനയുടെ നാടൻപാട്ട് നടക്കും. വിപുലമായ വാഹന പാർക്കിങ്ങ് സൗകര്യം ഏർപ്പെടുത്തിയിട്ടുണ്ട്. സുരക്ഷക്കായി സിസിടിവി ക്യാമറകളും സുരക്ഷാ ജീവനക്കാരുടെ സേവനവും ഉണ്ട്. മൂന്നാം തവണയാണ് ഫെസ്റ്റ് സംഘടിപ്പിച്ചിരിക്കുന്നത്.
