പെരുമ്പാവൂർ: വാഴക്കുളം ചെമ്പറക്കിയിൽ ഭർത്താവ് ഭാര്യയെ വെട്ടിക്കൊലപ്പെടുത്തി. ചെമ്പറക്കി നാലു സെൻ്റ് കോളനിയിൽ പാറക്കാട്ടുമോളം രവിയുടെ മകൾ 28 വയസ്സുള്ള അനുമോളാണ് വെട്ടേറ്റ് മരിച്ചത്. അനുവിന്റെ ഭർത്താവ് വാഴക്കുളം, കൈപ്പൂരിക്കര, മുല്ലപ്പിള്ളി വീട്ടിൽതടം കോളനിയിൽ താമസിക്കുന്ന 31 വയസ്സുള്ള രജീഷിനെ തടിയിട്ടപറമ്പ് പോലീസ് അറസ്റ്റ് ചെയ്തു.
ഞായറാഴ്‌ച രാവിലെ പത്തരയോടെയായിരുന്നു സംഭവം. വീട്ടിൽ മറ്റാരും ഇല്ലാതിരുന്ന സമയത്ത് കയ്യിൽ കരുതിയ ചുറ്റികയുമായി എത്തിയ പ്രതി അനുമോളെ തലക്കടിച്ച് വീഴ്ത്തുകയായിരുന്നു. അടിയുടെ ആഘാതത്തിൽ തലയോട്ടി പിളർന്നതായി പോലീസ് പറഞ്ഞു. പിന്നീട് വീട്ടിൽ ഉണ്ടായിരുന്ന കത്തി ഉപയോഗിച്ച് അനുവിന്റെ ശരീരമാസകലം ആഴത്തിൽ മുറിവ് ഉണ്ടാക്കി. പിതാവ് രവി വീട്ടിലെത്തിയപ്പോഴാണ് സംഭവം അറിയുന്നത്. ഉടൻതന്നെ നാട്ടുകാരെയും, തുടർന്ന് പോലീസിലും വിവരമറിയിച്ചു. തടിയിട്ടപറമ്പ് പോലീസ് സ്ഥലത്തെത്തി നടത്തിയ അന്വേഷണത്തിൽ പ്രതി ആലുവയിലേക്ക് ബസ്സിൽ കയറി പോയതായി വിവരം ലഭിച്ചു. പ്രതിയെ പിന്തുടർന്ന് ആലുവ മണപ്പുറത്ത് നിന്നുമാണ് ഇയാളെ പോലീസ് കസ്റ്റഡിയിൽ എടുത്തത്.
പ്രതിക്കുണ്ടായ സംശയങ്ങളാണ് കൊലപാതകത്തിന് കാരണം. വളരെ മൃഗീയമായിട്ടാണ് പ്രതി കൊലപാതകം ചെയ്തത് എന്ന് പോലീസ് പറഞ്ഞു. ഇവരുടെ വിവാഹം കഴിഞ്ഞിട്ട് അഞ്ചു വർഷം ആയി. തടിയിട്ടപറമ്പ് സി ഐ മനോജ് കുമാർ, എസ് ഐ റാസിക്ക് എന്നിവരുടെ നേതൃത്വത്തിൽ അറസ്റ്റ് ചെയ്ത പ്രതിയെ സംഭവസ്ഥലത്ത് എത്തിച്ചു തെളിവെടുപ്പ് നടത്തി. പെൺകുട്ടിയുടെ മൃതദേഹം പോസ്റ്റ്മോർട്ടത്തിനുശേഷം ഉച്ചയ്ക്ക് രണ്ടു മണിയോടെ വീട്ടിലെത്തിക്കും. തുടർ നടപടികൾക്ക് ശേഷം പ്രതിയെ ഇന്ന് കോടതിയിൽ ഹാജരാക്കും.
