മലയാറ്റൂർ: വിശുദ്ധ വാരത്തോടനുബന്ധിച്ച് മലയാറ്റൂർ കുരിശുമുടിയിൽ തീർഥാടകരുടെ തിരക്ക് വർധിച്ചു. ഏറ്റവും കൂടുതൽ തീർഥാടകർ എത്തുന്നത് വിശുദ്ധ വാരത്തിലാണ്. 50 നോമ്പ് ആരംഭം മുതൽ ദിവസവും ധാരാളം തീർഥാടകർ വരുന്നുണ്ട്. കുരിശേന്തിയും കിലോമീറ്ററുകളോളം കാൽനടയായും ഒട്ടേറെ തീർഥാടകരെത്തുന്നു. . തീർഥാടകരുടെ സൗകര്യാർഥം വിപുല ഒരുക്കങ്ങളാണ് നടത്തിയിരിക്കുന്നത്. വെളിച്ചവും ശുദ്ധജലവും കുരിശുമുടിയിലും മലമുകളിലേക്കുള്ള പാതയിലും അടിവാരത്തും ആവശ്യത്തിന് ഉണ്ട്. അടിവാരത്ത് മാർത്തോമ്മാ ശ്ലീഹയുടെ രൂപത്തിനു സമീപവും ഒന്നാം സ്ഥലത്തിന് അടുത്തും മലമുകളിലും ഡോക്ടർമാരുടെയും നഴ്സുമാരുടെയും സാന്നിധ്യത്തിൽ മെഡിക്കൽ സെന്ററുകൾ പ്രവർത്തിക്കുന്നു.
സ്ട്രെച്ചർ ഡ്യൂട്ടിക്കാർ 24 മണിക്കൂറും ഉണ്ട്. സെക്യൂരിറ്റി സ്റ്റാ ഫുകളും വൊളന്റിയർമാരും ഭാരത് സ്‌കൗട്ടിന്റെ 30 അംഗ സന്നദ്ധ സേനയും എല്ലാ ഭാഗത്തും സേവനത്തിന് രംഗത്തുണ്ട്. പൊലീസും അഗ്നിരക്ഷാ സേനയും പ്രവർത്തനസജ്ജമാണ്. അടിവാരത്ത് ആംബുലൻസ് സൗകര്യം ഉണ്ട്. എൻക്വയറി കൗണ്ടറും ഇൻഫർമേഷൻ സെന്ററും പ്രവർത്തിക്കുന്നു. മലമുകളിലും താഴത്തെ പള്ളിയിലും മാർത്തോമ്മാ ശ്ലീഹയ്ക്കു സമർപ്പണം നടത്തുന്ന അടിമവയ്ക്കൽ ശുശ്രൂഷ 24 മണിക്കൂറും നടക്കുന്നു.
കുമ്പസാരത്തിന് വിപുലമായ സൗകര്യം കുരിശുമുടിയിലും താഴത്തെ പള്ളിയിലും ഒരുക്കിയിട്ടുണ്ട്. വൈദികരോടൊപ്പം സംഘമായി വരുന്ന തീർഥാടകർക്ക് പ്രത്യേകമായ കുർബാന അർപ്പിക്കാൻ താഴത്തെ പള്ളിയിലും കുരിശുമുടിയിലും സൗകര്യമുണ്ട്. താഴത്തെ പള്ളിയിൽ തീർഥാടകർക്ക് വിശ്രമിക്കുന്നതിന് പന്തൽ സൗകര്യം ഒരുക്കിയിട്ടുണ്ട്. അതിനോടു ചേർന്നു പൊൻകുരിശ് എഴുന്നള്ളിക്കൽ നേർച്ച നിറവേറ്റാനുള്ള സൗകര്യവും ഉണ്ടാകും. വിപുലമായ പാർക്കിങ് സൗകര്യം ഏർപ്പെടുത്തിയിട്ടുണ്ട്.
പെസഹ വ്യാഴം, ദുഖവെളളി, പീഡാനുഭവ ശനി, വലിയ ശനി, ഉയിർപ്പ് ഞായർ തിരുക്കർമങ്ങൾ രണ്ടിടത്തും നടക്കും. താഴത്തെ പള്ളിയിൽ പൊൻകുരിശ് എഴുന്നള്ളിക്കൽ ശുശ്രൂഷയ്ക്ക് സൗകര്യം ഉണ്ടാകും. 24 മണിക്കൂറും മല കയറാം. നേരത്തെ അറിയിച്ച് എത്തുന്ന തീർഥാടകർക്ക് താഴത്തെ പള്ളിക്കു സമീപം പിൽഗ്രിം സെന്ററിൽ താമസത്തിനും വിശ്രമത്തിനും സൗകര്യം ലഭിക്കും. ഗ്രീൻ പ്രോട്ടോക്കോൾ ഫലപ്രദമായി നടപ്പാക്കാനുള്ള സംവിധാനം ഒരുക്കിയിട്ടുണ്ട്. ഇരുന്നൂറോളം സിസി ടിവി ക്യാമറകൾ പലയിടത്തുമായി സജ്ജീകരിച്ചിട്ടുണ്ട്.
