പെരുമ്പാവൂർ: കൊച്ചി വിമാനത്താവളം വഴി മാനിന്റെ കൊമ്പ് കടത്താൻ ശ്രമിച്ച ബ്രിട്ടീഷ് പൗരനെ പെരുമ്പാവൂർ കോടതി റിമാന്റ് ചെയ്തു. ഭാര്യയോടൊപ്പം എയർഇന്ത്യ വിമാനത്തിൽ ലണ്ടനിലേയ്ക്ക് പോകാനെത്തിയ പോൾ റിച്ചാർഡിനെയാണ് റിമാന്റ് ചെയ്തത്. ചെക്ക്-ഇൻ ബാഗേജിലാണ് മാൻകൊമ്പ് ഒളിപ്പിച്ചിരുന്നത്. സുരക്ഷാ പരിശോധനയ്ക്കിടെ സിയാൽ സെക്യുരിറ്റിയാണ് ബാഗേജിൽ മാൻകൊമ്പ് കണ്ടെത്തിയത്. സിയാൽ സുരക്ഷാ വിഭാഗം അറിയിച്ചതിനെ തുടർന്ന് കസ്റ്റംസ് ഇയാളെ കസ്റ്റഡിയിലെടുത്തു.
കർണാടകയിലെ ഒരു റിസോർട്ടിൽ താമസിച്ചപ്പോൾ കിട്ടിയതാണ് മാൻകൊമ്പെന്നും കൗതുകം തോന്നി ബാഗേജിൽ സൂക്ഷിച്ചതാണെന്നുമാണ് ഇയാൾ മൊഴി നൽകിയിരിക്കുന്നത്. വൈൽഡ് ലൈഫ് ക്രൈം കൺട്രോൾ ബ്യൂറോ ഉദ്യോഗസ്ഥരെത്തിയാണ് മാൻകൊമ്പാണെന്ന് സ്ഥിരീകരിച്ചത്. കൂടുതൽ അന്വേഷണങ്ങൾക്കായി ഇയാളെ വനംവകുപ്പിന് കൈമാറിയിരുന്നു.
