കാലടി: നിരന്തര കുറ്റാവാളിയെ കാപ്പ ചുമത്തി നാട് കടത്തി. അയ്യമ്പുഴ മുരിങ്ങേടത്തുപാറ കൂട്ടാല വീട്ടിൽ നിഖിൽ (26) നെ യെയാണ് കാപ്പ ചുമത്തി ഒരു വർഷത്തേക്ക് നാട് കടത്തിയത്. ഓപ്പറേഷൻ ഡാർക്ക് ഹണ്ടിന്റെ ഭാഗമായി ജില്ല പോലീസ് മേധാവി വിവേക് കുമാർ സമർപ്പിച്ച റിപ്പോർട്ടിന്റെ അടിസ്ഥാനത്തിൽ എറണാകുളം റേഞ്ച് ഡിഐ ജിപുട്ട വിമലാദിത്യയാണ് ഉത്തരവിട്ടത്.
അയ്യമ്പുഴ, കാലടി , പീച്ചി പോലീസ് സ്റ്റേഷൻ പരിധികളിൽ കൊലപാതക ശ്രമം, കവർച്ച, കഠിന ദേഹോപദ്രവം, ന്യായ വിരോധമായി സംഘം ചേരൽ അതിക്രമിച്ചുകടക്കൽ, ഭീഷണിപ്പെടുത്തൽ, ആയുധ നിയമം, സർക്കാർ ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസപ്പെടുത്തൽ തുടങ്ങിയ കേസുകളിൽ പ്രതിയാണ്. ഇയാളെ 2022 മെയ് മുതൽ ഒരു വർഷത്തേക്ക് നാട് കടത്തിയിരുന്നു. കാലാവധി കഴിഞ്ഞ് നാട്ടിൽ പ്രവേശിച്ച ഇയാൾ കഴിഞ്ഞ ആഗസ്റ്റിൽ മഞ്ഞപ്രയിലെ ഒരു ബാറിൽ ജീവനക്കാരെ കയ്യേറ്റം ചെയ്ത് നാശനഷ്ടം വരുത്തിയതിന് കാലടി പോലീസ് സ്റ്റേഷനിൽ രജിസ്റ്റർ ചെയ്ത കേസിൽ പ്രതിയായതിനെ തുടർന്നാണ് നടപടി. ഇതേ കേസൽ ഉൾപ്പെട്ട ഇയാളുടെ കൂട്ടാളി എബിയെ കഴിഞ്ഞ ദിവസം ഒരു വർഷത്തേക്ക് നാട് കടത്തിയിരുന്നു.
ഓപ്പറേഷൻ ഡാർക്ക് ഹണ്ടിന്റെ ഭാഗമായി 74 പേരെ നാട് കടത്തി. 92 പേരെ കാപ്പ ചുമത്തി ജയിലിലടച്ചു.
