കാലടി: കാപ്പാ ഉത്തരവ് പ്രകാരം നാടുകടത്തപ്പെട്ടയാൾ യുവാവിനെ ആക്രമിച്ച് പരിക്കേൽപ്പിച്ച കേസിൽ അറസ്റ്റിൽ. കാഞ്ഞൂർ വടക്കും ഭാഗം ചെങ്ങൽ അമ്പലനട ഭാഗത്ത് ഷിൻ്റോ ( തംബുരു 40) യെയാണ് കാലടി പോലീസ് അറസ്റ്റ് ചെയ്തത്. തിങ്കളാഴ്ച രാത്രി അമ്പലനടയ്ക്ക് സമീപം വച്ച് അമ്പലനട സ്വദേശിയായ യുവാവിനാണ് ആക്രമണത്തിൽ പരിക്കേറ്റത്. വ്യക്തി വൈരാഗ്യമാണ് ആക്രമണത്തിന് കാരണം.
പരാതിക്കാരനായ യുവാവിൻ്റെ സ്കൂട്ടർ തടഞ്ഞു നിർത്തി ആക്രമിക്കുകയായിരുന്നു. തുടർന്ന് സ്കൂട്ടറുമായി ഷിൻ്റോ കടന്നു കളഞ്ഞു. തൃശൂർ ഭാഗത്ത് നിന്നാണ് ഇയാളെ പിടികൂടിയത്. കാലടി പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ട ഇയാൾ കാലടി, ഒല്ലൂർ പോലീസ് സ്റ്റേഷനുകളിലെ നിരവധി കേസുകളിൽ ഉൾപ്പെട്ടിട്ടുള്ളയാളാണ്.
കാപ്പാ ഉത്തരവ് പ്രകാരം റൂറൽ ജില്ലയിൽ പ്രവേശിക്കുന്നതിന് വിലക്കുണ്ടായിരുന്നു.ഇൻസ്പെക്ടർ അനിൽ കുമാർ ടി മേപ്പിള്ളി, എസ്. ഐമാരായ എം.എസ് ശ്യാം , ഒ.എ ഉണ്ണി, അജ്മൽ, പി.വി ജോർജ്, സി.പി.ഒ നിഖിൽ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.
