കാലടി : വിശ്വഹിന്ദു പരിഷത്ത് കാലടി പ്രഖണ്ഡിന്റെ നേതൃത്വത്തിൽ ഗണേശോത്സവം 25,26,27 തീയതികളിൽ നടക്കും. 25 ന് രാവിലെ കാലടി ടൗൺ ഓപ്പൺ എയർ സ്റ്റേഡിയത്തിൽ ഗണപതി വിഗ്രഹ പ്രതിഷ്ഠയോടുകൂടി ആരംഭം കുറിക്കും. തുടർന്ന് അഷ്ടദ്രവ്യ ഗണപതിഹോമം, വൈകിട്ട് 6 ന് പ്രശസ്ത ഭജന ഗായകൻ കോഴിക്കോട് ഡോ. പ്രശാന്ത് വർമ്മ നയിക്കുന്ന ഭജന മാനസ ജപലഹരി. 26 ന് രാവിലെ 6 ന് അഷ്ടദ്രവ്യ ഗണപതിഹോമം, വൈകിട്ട് 6 ന് സാംസ്‌കാരിക സമ്മേളനം വിശ്വഹിന്ദു പരിഷത്ത് സംസ്ഥാന അധ്യക്ഷൻ വിജി തമ്പി ഉദ്ഘാടനം ചെയ്യും. ഹിന്ദു ഐക്യവേദി സംസ്ഥാന മുഖ്യ രക്ഷാധികാരി കെ.പി ശശികല ടീച്ചർ മുഖ്യപ്രഭാഷണം നടത്തും. വിശ്വഹിന്ദു പരിഷത്ത് കാലടി പ്രഖണ്ഡ് പ്രസിഡന്റ് എം.പി ഗോപാലകൃഷ്ണൻ അദ്ധ്യക്ഷത വഹിക്കും.
മധ്യപ്രദേശ് വിക്രം യൂണിവേഴ്സിറ്റിയിൽ ബി.എസ്.സി ഫോറൻസിക് സയൻസിൽ രണ്ടാം റാങ്ക് ജേതാവ് ഭദ്ര അനിൽ കുമാറിന് അനുമോദിക്കും.
ചതുർത്ഥി ദിവസമായ 27 ന് രാവിലെ 6 ന് 108 നാളികേരം കൊണ്ട് അഷ്ടദ്രവ്യ മഹാഗണപതി ഹോമം, ഉച്ചയ്ക്ക് 12 ന് കാലടി ടൗൺ ഓപ്പൺ എയർ സ്റ്റേഡിയത്തിൽ മഹാപ്രസാദ ഊട്ട്. വൈകിട്ട് 4 ന് മറ്റൂർ വാമനപുരം ശ്രീ മഹാവിഷ്ണു ക്ഷേത്രാങ്കണത്തിൽ നിന്നും സിനിമാ നടൻ ദേവൻ ഉദ്ഘാടനം ചെയ്യുന്ന ഘോഷയാത്ര താളമേള വാദ്യങ്ങളും, കാവടി, ടാബ്ലോ, കലാരൂപങ്ങൾ, നൃത്തനൃത്യങ്ങൾ, ഡി.ജെ സൗണ്ട് സിസ്റ്റം എന്നിവയുടെ അകമ്പടിയോടെ മഹാനിമജ്ജന ഘോഷയാത്ര കാലടി ശൃംഗേരി മുതലക്കടവിൽ എത്തിച്ചേരും.പൂജകൾക്ക് ശേഷം പെരിയാറിൽ നിമജ്ജനം തുടർന്ന് പ്രസാദ വിതരണം, കാലടി ശ്രീകൃഷ്ണ സ്വാമി ക്ഷേത്രത്തിൽ അന്നദാനം.
