അങ്കമാലി: സ്കൂട്ടർ യാത്രക്കാരിയെ കാറിടിപ്പിച്ച് വീഴ്ത്തി മാല പൊട്ടിക്കാൻ ശ്രമം.എളവൂർ പാലിപ്പുഴ പാത്താടൻ വീട്ടിൽ അജയകുമാറിന്റെ ഭാര്യ ബിജിമോൾക്ക് ഗുരുതര പരിക്കേറ്റു.ഭർത്താവിനെ അങ്കമാലിയിലെ ബസ് സ്റ്റാൻഡിൽ വിട്ടതിനുശേഷം തിരികെ വരികയായിരുന്ന ബിജിയുടെ സ്കൂട്ടറിലാണ് പിന്തുടർന്നെത്തിയ കാർ ഇടിപ്പിച്ചത്. കാറിടിച്ചതിനെ തുടർന്ന് സ്കൂട്ടർ സമീപത്തെ കനാലിലേക്ക് വീഴുകയും ബിജി റോഡിലേക്ക് തെറിച്ചു വീഴുകയുമായിരുന്നു.കാറിൽ നിന്നും ഇറങ്ങിയ യുവാവ് സഹായിക്കാൻ എന്ന വ്യാജേന എഴുന്നേൽപ്പിക്കുകയും കഴുത്തിൽ കിടന്ന സ്വർണ്ണ നിറമുള്ള കൊന്ത സ്വർണ്ണ മാല എന്ന് കരുതി പൊട്ടിച്ചെടുക്കുകയും ചെയ്തു.പിന്നീട് കൊന്ത ഉപേക്ഷിച്ച് യുവാവ് കാറിൽ കയറി രക്ഷപ്പെടുകയായിരുന്നു.
മൂന്ന് കിലോമീറ്റർ ഓളം ബിജി സഞ്ചരിച്ച സ്കൂട്ടറി നെ പ്രധാന റോഡിലൂടെയും ഇട വഴികളിലൂടെയും കാർ പിന്തുടരുന്നത് സമീപത്തെ സിസിടിവി ദൃശ്യങ്ങളിൽ നിന്നും പോലീസ് കണ്ടെത്തിയിട്ടുണ്ട്. വെള്ള നിറമുള്ള മാരുതി സെലേറിയോ കാർ ആണ് ദൃശ്യങ്ങളിൽ പതിഞ്ഞിട്ടുള്ളത്. കാറിന്റെ ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം ഊർജ്ജിതമാക്കിയിട്ടുണ്ട്.
