ആലുവ: എടപ്പള്ളി – പൂക്കാട്ടുപടി റോഡില്‍ ഓടുന്ന സ്വകാര്യ ബസില്‍ യാത്ര ചെയ്ത സ്ത്രീയുടെ പേഴ്സില്‍ സൂക്ഷിച്ചിരുന്ന 13,000 രൂപ ആധാര്‍ കാര്‍ഡ്, ഇലക്ഷന്‍ കാര്‍ഡ്, എ.ടി.എം കാര്‍ഡുകൾ എന്നിവ അടങ്ങിയ പേഴ്സ് മോഷണം ചെയ്ത കേസിൽ തമിഴ്നാട് സ്വദേശിനി പിടിയിൽ. മധുര മീനാക്ഷി അമ്മാന്‍ കോവില്‍ തെരുവില്‍ ഡോര്‍ നമ്പര്‍ 6-ല്‍ താമസിക്കുന്ന മാരി (20) യെയാണ് എടത്തല പോലീസ് അറസ്റ്റ് ചെയ്തത്.
ആറാം തീയതിയാണ് സംഭവം. കങ്ങരപ്പടിയില്‍ നിന്നും ബസിൽ കയറി പൂക്കാട്ടുപടിയില്‍ ഇറങ്ങിയ സ്ത്രീയുടെ കൈവശമുള്ള ബാഗിന്‍റെ സിബ് തുറന്ന് കിടക്കുന്നത് ശ്രദ്ധയില്‍പെട്ട് ബാഗ് പരിശോധന നടത്തിയപ്പോഴാണ് പണവും മറ്റ് സാധനങ്ങളും അടങ്ങിയ പേഴ്സ് നഷ്ടപ്പെട്ടതായി അറിഞ്ഞത്. ഉടന്‍ തന്നെ എടത്തല പോലീസ് സ്റ്റേഷനില്‍ പരാതി നൽകി. മോഷ്ടാക്കളെ കുറിച്ച് പോലീസ് അന്വേഷണം നടത്തി വരവേ വീണ്ടും മോഷണം നടത്തുന്നതിനായി മറ്റൊരു ബസില്‍ യാത്ര ചെയ്തു വന്ന പ്രതിയെ കുറിച്ച് സൂചന ലഭിച്ചു. തുടർന്ന് ഡി.വൈ.എസ്.പി എ.പ്രസാദിന്‍റെ നിര്‍ദ്ദേശപ്രകാരം മോഷ്ടാവിനെ പിടികൂടുകയായിരുന്നു.
ഇന്‍സ്പെക്ടര്‍ കെ.ബി ഹരികൃഷ്ണന്‍, എസ്.ഐ അജയകുമാര്‍, സീനിയർ സി പി ഒ മാരായ മുഹമ്മദ്കുഞ്ഞ്, ഷെബിന്‍, സി പി ഒമാരായ ജോബി ജോസഫ്, അനീഷ്, ഇന്‍ഷാദ പരീത് എന്നിവർ ചേര്‍ന്നാണ് പ്രതിയെ പിടികൂടിയത്. കോടതിയിൽ ഹാജരാക്കി റിമാൻഡ് ചെയ്തു.
