ആലുവ: കർക്കിടകവാവിനോടനുബന്ധിച്ചു 24ന് ആലുവയിൽ ഗതാഗത ക്രമീകരണങ്ങൾ ഏർപ്പെടുത്തി. മണപ്പുറത്തേയ്ക്കുള്ള വാഹനങ്ങൾ സെമിനാരിപ്പടി റോഡു വഴിയും , പറവൂർ കവല മണപ്പുറം റോഡു വഴിയും മണപ്പുറത്തേയ്ക്ക് പോകാവുന്നതാണ്. മണപ്പുറത്തു നിന്നും തിരികെ വരുന്ന വാഹനങ്ങൾ പറവൂർ കവല റോഡിലൂടെ മാത്രമേ അനുവദിക്കുകയുള്ളൂ. തോട്ടയ്ക്കാട്ടുകരയിൽ നിന്നും മണപ്പുറം റോഡിലൂടെ ടൂ വീലർ ഉൾപ്പെടെയുള്ള വാഹനങ്ങൾ അനുവദിക്കുന്നതല്ല. പറവൂർകവല മണപ്പുറം റോഡിൽ “Y ജംഗ്ഷൻ “ ഭാഗം ഇടുങ്ങിയതാകയാൽ ഈ ഭാഗത്ത് വൺവേ ഏർപ്പെടുത്തിയിട്ടുള്ളതാണ്. മണപ്പുറം പാർക്കിങ്ങ് മൈതാനത്ത് നിന്നും വരുന്ന വാഹനങ്ങൾ പാർക്കിങ്ങ് ഗ്രൗണ്ട് റോഡിൽ ട്രാൻസ്ഫോർമർ ജംഗ്ഷൻ ഭാഗത്തു നിന്നും ഇടത്തേയ്ക്ക് തിരിഞ്ഞ് ജിസിഡിഎ റോഡിൽ കൂടി പറവൂർ കവല റോഡിൽ പ്രവേശിച്ച് തിരികെ വരേണ്ടതാണ്. 24 പുലർച്ചെ മുതൽ പമ്പ് ജംഗ്ഷനിൽ നിന്നും ബാങ്ക് ജംഗ്ഷൻ ഭാഗത്തേയ്ക്ക് ടൂ വീലർ ഒഴികെയുള്ള വാഹനങ്ങൾ അനുവദിക്കുന്നതല്ല.
ബാങ്ക് ജംഗ്ഷൻ ഭാഗത്ത് , പങ്കജം റോഡിൻ്റെ സൈഡിലും , സിവിൽ സ്റ്റേഷൻ റോഡിൻ്റെ സൈഡിലും, ഗുഡ് ഷെഡ് ഗ്രൗണ്ട്ഭാഗത്തും,കൂടാതെ ജീവാസ് സ്ക്കൂൾ ഗ്രൗണ്ടിലും, ശിവഗിരി സ്ക്കൂൾ ഗ്രൗണ്ടിലും (അദ്വൈതാശ്രമത്തിന് എതിർവശം) കാർ ഉൾപ്പെടെയുള്ള വാഹനങ്ങൾ പാർക്ക് ചെയ്യാവുന്നതാണ്. പാർക്ക് ചെയ്യേണ്ട വാഹനങ്ങൾ ഗ്രാൻ്റ് ജംഗ്ഷനിൽ നിന്നും പ്രവേശിക്കേണ്ടതാണ്. ബലിതർപ്പണത്തിനായി എൻ.എച്ചിലൂടെ എറണാകുളം ,നോർത്തു പറവൂർ , അങ്കമാലി ഭാഗങ്ങളിൾ നിന്നും വരുന്നവരുടെ വാഹനങ്ങൾ പറവൂർ കവല ,സെമിനാരിപ്പടി ഭാഗത്തുള്ള ഡ്രൈവിംഗ് സ്ക്കൂൾ ഗ്രൗണ്ടുകളിൽ പാർക്ക് ചെയ്യാവുന്നതാണ്.
പുലർച്ചെ ബൈപ്പാസ് – പമ്പ് ജംഗ്ഷൻ റോഡ് ബ്ലോക്ക് ആകുന്ന പക്ഷം ദേശീയ പാതയിൽ നിന്നും ടൗണിലേക്കുള്ള വാഹനങ്ങൾ ബൈപ്പാസിൽ നിന്നും പുളിഞ്ചോട് വഴി തിരിച്ചു വിടുന്നതാണ്.
മറ്റ് ക്രമീകരണങ്ങൾ
കർക്കിടകവാവ്ബലി ഡ്യൂട്ടിയോടനുബന്ധിച്ച് തിരക്കിൽപ്പെട്ട് അനിഷ്ടസംഭവങ്ങളും മറ്റും ഒഴിവാക്കുന്നതിനും, ജനങ്ങളുടെ സുരക്ഷ ഉറപ്പ് വരുത്തുന്നതുനും താഴെപറയുന്ന ക്രമീകരണങ്ങൾ കൂടി ഉണ്ടായിരിക്കുന്നതാണ്. ആലുവ മണപ്പുറത്തേയ്ക്ക്, ആലുവ പാലസ് ഭാഗത്ത് നിന്നും ഉള്ള പാലത്തിന്റെ പടിഞ്ഞാറു ഭാഗത്തിലുടെയും തിരികെ ആലുവ മണപ്പുറത്തുനിന്നും ആലുവ പാലസ് ഭാഗത്തേക്ക് പാലത്തിന്റെ കിഴക്കു ഭാഗത്തിലൂടെയും ആളുകളെ കടത്തി വിടുന്നതാണ്.
ആലുവ മണപ്പുറത്തേയ്ക്ക് ഉള്ള ആളുകളെ കാൽനടയായി മാത്രം തോട്ടയ്ക്കാട്ട് കര മണപ്പുറം റോഡ് അനുവദിക്കും.
പെരിയാർ പുഴയിൽ ജലനിരപ്പ് ഉയരുന്ന സാഹചര്യം ഉണ്ടായാൽ അപകട സാദ്ധ്യത കണക്കിലെടുത്ത്, പുഴയിൽ ഇറങ്ങാൻ അനുവദിക്കുന്നതല്ല. മണപ്പുറത്തുള്ള അമ്പലത്തിൽ നിന്നും, 50 മീറ്റർ ചുറ്റളവിൽ യാതൊരുവിധ വഴിയോരകച്ചവടങ്ങളും അനുവദിക്കുന്നതല്ല. കുളിക്കടവിലും , പുഴയിലും , ലൈഫ് ബാഗ് ഉൾപ്പെടെ പോലീസ്, ഫയർഫോഴ്‌സ് ബോട്ടുകൾ പട്രോളിംങ് നടത്തുന്നതാണ് . ആവശ്യത്തിനുള്ള ആംബുലൻസ് സർവ്വീസ്, മെഡിക്കൽ ഓഫീസേഴ്സിന്റെ നേതൃത്വത്തിൽ പ്രവർത്തിക്കുന്നതാണ്.
