കാലടി: രക്തദാന പ്രവർത്തനത്തിലെ മികവിന് എ പി ജെ അബ്ദുൽകലാം ടെക്നോളജിക്കൽ യൂണിവേഴ്സിറ്റി എൻ എസ് എസ് സെല്ലിൽ നിന്നും നാല് പുരസ്കാരങ്ങൾ കരസ്ഥമാക്കിയിരിക്കുകയാണ് ആദിശങ്കര എൻജിനീയറിങ് കോളജിലെ നാഷണൽ സർവീസ് സ്കീം. കഴിഞ്ഞ വർഷം യൂണിവേഴ്സിറ്റി തലത്തിൽ ഏറ്റവും അധികം രക്തദാനം ചെയ്തതിനും ഏറ്റവും കൂടുതൽ രക്തദാന ക്യാമ്പുകൾ സംഘടിപ്പിച്ചതിനും ഉള്ള പുരസ്കാരം കോളേജ് കരസ്ഥമാക്കി. കൂടാതെ ഏറ്റവും കൂടുതൽ രക്തദാനം നടത്തിയ വിദ്യാർത്ഥിനിക്കുള്ള പുരസ്കാരം പി.എംശ്രീലക്ഷ്മിക്കും സമ്മാനിച്ചു.
എറണാകുളം ജില്ലയിലെ രക്തദാന പ്രവർത്തനങ്ങൾക്ക് നേതൃത്വം കൊടുത്തതിനുള്ള പുരസ്കാരം ആഷിഖ് പ്രദീപ് ഏറ്റുവാങ്ങി. കോളേജിനുള്ള പുരസ്കാരം പ്രോഗ്രാം ഓഫീസർമാരായ സിജോ ജോർജ്ജ്, അശ്വിൻ രാജ്, സ്റ്റുഡൻ്റ് കോർഡിനേറ്റർ എ വി അൻസ എന്നിവർ ചേർന്ന് ഏറ്റുവാങ്ങി.
തിരുവനന്തപുരത്ത് വച്ച് നടന്ന ചടങ്ങിൽ ഡെപ്യൂട്ടി ഇൻസ്പെക്ടർ ജനറൽ ഓഫ് പോലീസ് ജയദേവ് ജി ഐ പി എസ് പുരസ്കാരങ്ങൾ വിതരണം ചെയ്തു. കഴിഞ്ഞ മൂന്നു വർഷങ്ങളിലും മികച്ച രക്തദാനപ്രവർത്തനത്തിനുള്ള സർവകലാശാല എൻ എസ് എസ് പുരസ്കാരങ്ങൾ കോളേജ് നേടിയിരുന്നു.
