കാലടി: ആദിശങ്കര ഇൻസ്റ്റിറ്റ്യൂട്ട് ഓഫ് എൻജിനീയറിംഗ് ആൻഡ് ടെക്നോളജിക്ക് ബംഗാൾ ഗവർണറുടെ ഗവർണേഴ്സ് അക്കാദമിക് എക്സലൻസ് പുരസ്ക്കാരം. ബംഗാൾ ഗവർണർ ഡോ. സി വി ആനന്ദ ബോസാണ് പുരസ്ക്കാരം പ്രഖ്യാപിച്ചത്. ഒരു ലക്ഷം രൂപയാണ് പുസ്ക്കാര തുക. ബംഗാൾ ലോക്ഭവനിൽ നടക്കുന്ന ചടങ്ങിൽ ആദിശങ്കര മാനേജിങ്ങ് ട്രസ്റ്റി കെ. ആനന്ദ് പുരസ്ക്കാരം ഏറ്റുവാങ്ങും. പാഠ്യ പാഠ്യേതര മേഖലകളിലെ നേട്ടം, കോളേജ് സമൂഹത്തിന് ചെയ്യുന്ന പ്രവർത്തനങ്ങൾ, അധ്യാപകരുടെ ഉയർന്ന യോഗ്യത, കോളേജിലെ മികച്ച സൗകര്യങ്ങൾ എന്നിവ വിലയിരുത്തിയാണ് പുരസ്ക്കാരം ലഭിച്ചത്.
നേരത്തെ മികച്ച എൻഎസ്എസ് യൂണിറ്റിനും, മികച്ച എൻഎസ്എസ് പ്രോഗ്രാം ഓഫീസറിനുമുള്ള രാഷ്ട്രപതിയുടെ പുരസ്ക്കാരം കോളേജ് നേടിയിട്ടുണ്ട്. സംസ്ഥാനതലത്തിൽ തുടർച്ചയായി മൂന്നു വർഷം മികച്ച എൻഎസ്എസ് യൂണിറ്റ്, മികച്ച പ്രോഗ്രാം ഓഫീസർ, മികച്ച വോളണ്ടിയർ എന്നീ പുരസ്കാരങ്ങൾ ആദിശങ്കരയ്ക്ക് ലഭിച്ചിട്ടുണ്ട്.കൂടാതെ നിരവധി ദേശീയ അന്തർ ദേശീയ പുരസ്ക്കാരങ്ങളും കോളേജ് കരസ്ഥമാക്കിയിട്ടുണ്ട്. രക്തദാനം, പ്രളയകാലത്തെ രക്ഷാപ്രവർത്തനം, കോവിഡ് കാലത്തെ പദ്ധതികൾ, നൈപുണ്യ വികസന പരിപാടികൾ, സ്വച്ഛ് ഭാരത് പ്രവർത്തങ്ങൾ, ജില്ലാ ഭരണകൂടവുമായി ചേർന്ന് വിവിധയിടങ്ങളിൽ നടപ്പിലാക്കിയ ഗ്രീൻ പ്രോട്ടോകോൾ പ്രവർത്തനങ്ങൾ, മെഡിക്കൽ ക്യാമ്പുകൾ, പ്രകൃതി സംരക്ഷണ പ്രവർത്തനങ്ങൾ, നിർധന കുടുംബങ്ങൾക്ക് ഭവന നിർമാണം, അന്തർദേശീയ-ദേശീയ പരിപാടികളിലെ പങ്കാളിത്തം തുടങ്ങി നിരവധി പദ്ധതികൾ കോളേജ് നടപ്പിലാക്കിയിട്ടുണ്ട്.
സമൂഹത്തിന്റെ വളർച്ചയ്ക്ക് ഉതകുന്ന വിവിധങ്ങളായ ആധുനിക ഉപകരണങ്ങൾ കോളേജിലെ വിദ്യാർത്ഥികളും അധ്യാപകരും ചേർന്ന് വികസിപ്പിച്ചെടുത്തിട്ടുണ്ട്
