കാലടി: ആദിശങ്കര ഇൻസ്റ്റിറ്റ്യൂട്ട് ഓഫ് എഞ്ചിനീയറിംഗ് ആൻഡ് ടെക്നോളജിയിൽ ദേശീയ ടെക്നോ കൾചറൽ ഫെസ്റ്റ് ബ്രഹ്മ – 2026 വെള്ളിയാഴ്ച്ച തുടക്കമാകും. 8 ന് സമാപിക്കും. വെള്ളിയാഴ്ച രാവിലെ 9.30 ന് പ്രമുഖ കർണ്ണാടക സംഗീതജ്ഞർ നയിക്കുന്ന ത്യാഗരാജ ആരാധനയോടെയാണ് പരിപാടികൾ ആരംഭിക്കുന്നത്. വിദ്യാർത്ഥികളും അധ്യാപകരും സംഗീത ആരാധനയിൽ പങ്കെടുക്കും. പ്രശസ്ത പിന്നണി ഗായിക ഡോ. ബി. അരുന്ധതിക്ക് ആദിശങ്കര സംഗീത ശ്രേഷ്ഠ കലാപുരസ്ക്കാരം നൽകി ആദിശങ്കര ട്രസ്റ്റ് മാനേജിംഗ് ട്രസ്റ്റി കെ. ആനന്ദ് ആദരിക്കും. 25001 രൂപയും ഫലകവും അടങ്ങുന്നതാണ് പുരസ്കാരം.
തുടർന്ന് 12.30 ന് അമ്പതോളം പേര് അണിനിരക്കുന്ന കലാമണ്ഡലം രതീഷ് നയിക്കുന്ന പഞ്ചാരി മേളവും വൈകീട്ട് 6.30 ന് തീം ഷോയും ഉണ്ടായിരിക്കും. 7, 8 തീയതികളിൽ ഭരതനാട്യം, കുച്ചിപ്പുടി, മോഹിനിയാട്ടം, വോയ്സ് ഓഫ് ബ്രഹ്മ, ബാൻഡ് ഓഫ് ബ്രഹ്മ, ഡിജെ വാർ, കൊറിയോ ഈവ്, കലാ ശാസ്ത്ര സാങ്കേതിക മത്സരങ്ങൾ എന്നിവ നടക്കും. അഞ്ച് വേദികളിലാണ് മത്സരങ്ങൾ.
3 ദിവസങ്ങളായി നടക്കുന്ന ഫെസ്റ്റിൽ ഇന്ത്യയിലെ വിവിധ കോളജുകളിൽ നിന്നുളള പതിനായിരത്തോളം വിദ്യാർഥികൾ പങ്കെടുക്കും. 90 മത്സരയിനങ്ങളിലായി 8 ലക്ഷം രൂപയുടെ സമ്മാനങ്ങളാണ് വിദ്യാർത്ഥികൾക്ക് നൽകുന്നത്.
