കാലടി: കേൾവിയും ശബ്ദവും അന്യമായ കുട്ടികളുടെ ശബ്ദമായിമാറിയ മാണിക്യമംഗലം സെന്റ് ക്ലെയർ ബധിര വിദ്യാലയത്തിലെ പ്രിൻസിപ്പൾ സിസ്റ്റർ അഭയ 32 വർഷത്തെ അധ്യാപനത്തിന് ശേഷം പടിയിറങ്ങുന്നു. സിസ്റ്ററുടെ നേതൃത്ത്വത്തിൽ സ്കൂളും വിദ്യാർത്ഥികളും മികച്ച നേട്ടമാണ് കരസ്ഥമാക്കിയത്. സിനിമകളിൽ മുക, ബധിര കഥാപാത്രങ്ങൾക്ക് ആംഗ്യ ഭാഷ പഠിപ്പിച്ചു കൊടുത്തിട്ടുണ്ട്. ‘സ്പിരിറ്റ്’ എന്ന സിനിമയിൽ മോഹൻലാലിന്റെ മകനായി അഭിനയിക്കുന്ന കുട്ടിയെ സിസ്റ്റർ ആംഗ്യഭാഷ പഠിപ്പിച്ചു, ചെന്നൈയിൽ ഒരു നാൾ’ എന്ന സിനിമയിൽ ഊമയായ നായികയെ അവതരിപ്പിച്ച നടി പാർവതി ഒരു മാസം മാണിക്യമംഗലം സ്കൂളിലെ ഹോസ്റ്റലിൽ താമസിച്ചാണ് മൂക ഭാഷ പഠിച്ചത്. ഊമപ്പെണ്ണിന് ഉരിയാടാ പയ്യൻ എന്നീ സിനിമയിലെ കഥാപാത്രങ്ങളെ ആംഗ്യ ഭാഷ പഠിപ്പിച്ചത് സിസ്റ്റർ അഭയയാണ്.
മാർപ്പാപ്പ ഇറക്കുന്ന ലേഖനങ്ങളും, വത്തിക്കാനിലെ സന്ദേശങ്ങളും, വാർത്തകളും സിസ്റ്റർ അഭയയാണ് ഇത് ആംഗ്യ ഭാഷയിലേക്ക് മാറ്റുന്നത്. മാർപ്പാപ്പയുടെ ലേഖനങ്ങളും സന്ദേശങ്ങളുമെല്ലാം ശ്രവണ വൈകല്യമുള്ളവർക്ക് മനസിലാക്കാൻ കഴിയാത്തതിനാൽ അവർക്കും ഇത് മനസിലാക്കുന്നതിനായി കെസിബിസി മീഡിയ കമ്മീഷൻ സെക്രട്ടറി ഫാ: എബ്രഹാം ഇരുമ്പനിക്കലാണ് ഇത്തരമൊരു ഉദ്യമത്തിന് തുടക്കം കുറിച്ചത്. ഇന്ത്യയിൽ ആദ്യമായാണ് മാർപ്പാപ്പയുടെ ലേഖനങ്ങളും, സന്ദേശങ്ങളും മറ്റും ബധിര മൂകർക്ക് മനസ്സിലാകുന്നതിന് ആംഗ്യ ഭാഷയിലേക്ക് മാറ്റുന്നത്. കോവിഡ് കാലത്ത് മുക, ബധിര വിദ്യാർത്ഥികൾക്ക് പാഠ്യവിഷയങ്ങൾ ആംഗ്യഭാഷയിലാക്കി വിഡിയോ രൂപത്തിലാക്കി നൽകുകയും ചെയ്തിരുന്നു സിസ്റ്റർ അഭയ.
മൂക ബധിരർക്കായി സിസ്റ്റർ ബൈബിൾ ആംഗ്യ ഭാഷയിലാക്കി. ഇതിന്റെ 3 വീഡിയോ സിഡികൾ പുറത്തിറക്കിയിട്ടുണ്ട്.വിവിധ പള്ളികളിൽ മൂക, ബധിരർക്കായി സിസ്റ്ററിന്റെ സഹായത്തോടെ പ്രത്യേക കുർബാന നടക്കാറുണ്ട്. കേരള കാത്തലിക് ബിഷപ് സൊ സൈറ്റി മുക, ബധിരർക്കായി ആരംഭിച്ച പ്രീമാജ് കോഴ്സിന്റെ കോ- ഓർഡിനേറ്ററും സിസ്റ്റർ അഭയയാണ്. മൂക, ബധിരർ ഉൾപ്പെട്ട കേസുകളിൽ ആശയ വിനിമയത്തിനു കോടതികളും സിസ്റ്റർ അഭയയുടെ സഹായം തേടുന്നുണ്ട്. ഇതിനകം 100 ഓളം കേസുകളിൽ കോടതികളിൽ പോയിട്ടുണ്ടെന്നു സിസ്റ്റർ അഭയ പറഞ്ഞു.
