പെരുമ്പാവൂർ: പെരുമ്പാവൂർ അർബൻ സഹകരണ ബാങ്കിലെ സാമ്പത്തിക ക്രമക്കേടുമായി ബന്ധപ്പെട്ട് ഭരണസമിതി അംഗം അറസ്റ്റിൽ , പെരുമ്പാവൂർ റയോൺ പുരം കളപ്പുരയ്ക്കൽ വീട് ഷറഫ് (59) നെയാണ് പെരുമ്പാവൂർ പോലീസ് അറസ്റ്റ് ചെയ്തത്. ശ്രീലങ്കയിലേക്ക് കടക്കുന്നതിനായി നെടുമ്പാശ്ശേരി എയർപോർട്ടിൽ എത്തിയപ്പോഴാണ് ഇയാൾ പിടിയിലാകുന്നത്. ഏകദേശം മുപ്പത്തിമൂന്ന് കോടിയിൽപ്പരം രൂപയുടെ ക്രമക്കേട് ഇയാളുൾപ്പെടുന്ന പ്രതികൾ നടത്തിയിരുന്നു. ഇത് സംബന്ധിച്ച് നിരവധി പരാതികളാണ് ജില്ലാ പോലീസ് മേധാവി യ്ക്ക് ലഭിച്ചിരുന്നത്. തുടർന്ന് ജില്ലാ പോലീസ് മേധാവി ഡോ. വൈഭവ് സക്സേനയുടെ നേതൃത്വത്തിൽ അന്വേഷണം ഊർജ്ജിതമാക്കിയിരുന്നു.
പതിറ്റാണ്ടുകളായി യുഡിഎഫ് ഭരിക്കുന്ന അർബൻ സഹകരണ ബാങ്കിൽ 100 കോടി ക്രമക്കേട് ആരോപിച്ചു സഹകരണ മന്ത്രിക്കു നിക്ഷേപ സംരക്ഷണ സമിതി നൽകയിരുന്നു. വ്യാജ ,ബെനാമി വായ്പകളിലൂടെ മുൻ ഭരണ സമിതി അംഗങ്ങളും സെക്രട്ടറിമാർ അടക്കമുള്ള ജീവനക്കാരും തട്ടിപ്പു നടത്തിയെന്ന് ആരോപിച്ചായിരുന്നു നിക്ഷേപ സംരക്ഷണ സമിതി പരാതി നൽകിയത്.
ഒരു വസ്തുവിൽ 20 ലക്ഷം രൂപയിൽ കൂടുതൽ വായ്പ നൽകാൻ പാടില്ലെന്നാണു വ്യവസ്ഥ. എന്നാൽ 3.60 കോടി രൂപ ബാധ്യതയുള്ള ഭൂമി ഈടു വാങ്ങി 7.80 കോടി രൂപ വായ്പ നൽകി ബാങ്കിനെ കടക്കെണിയിലാക്കിയെന്നാണ് ആക്ഷേപം. 39 വായ്പകൾ 20 ലക്ഷത്തിനു മുകളിലുള്ളവയാണ്. ഒരിക്കൽ പോലും അർബൻ ബാങ്കിൽ സാമ്പത്തിക ഇടപാടുകൾ നടത്താത്ത അംഗങ്ങളുടെ പേരിലും വ്യാജ രേഖകൾ ഉണ്ടാക്കി വൻ തുക വായ്പയെടുത്തിട്ടുണ്ട്.
ഒരു ലക്ഷം മുതൽ 2 കോടി രൂപ വരെ തിരികെ കിട്ടാനുള്ള നിക്ഷേപകരുണ്ട്. ഇതിൽ അതിഥിത്തൊഴിലാളികളും ഉൾപ്പെടുന്നു. ആശുപത്രിച്ചെലവു പോലെയുള്ള അടിയന്തര ആവശ്യങ്ങൾക്കു മാത്രമാണു നിക്ഷേപകർക്കു പണം പിൻവലിക്കാൻ ഇപ്പോൾ അനുവാദം.
2017 മുതൽ 2024 വരെ വായ്പ കുടിശിക വരുത്തിയ 794 പേരുടെ വിവരങ്ങൾ ബാങ്ക് സഹകരണ അസിസ്റ്റന്റ് റജിസ്ട്രാർക്കു കൈമാറിയിരുന്നു. എആർഒയുടെ സാന്നിധ്യത്തിൽ ഇതിൽ 559 കേസ് തീർപ്പാക്കിയെന്നു പറയുന്നുണ്ടെങ്കിലും 50 കേസ് മാത്രമാണു തീർപ്പാക്കിയതെന്നു സമിതി ഭാരവാഹികൾ പറയുന്നു.
സമിതിയിലെ അംഗങ്ങൾ 200 പരാതി പൊലീസിൽ നൽകിയിട്ടുണ്ട്. ഇതിൽ 20ൽ താഴെ എഫ്ഐആർ ആണു റജിസ്റ്റർ ചെയ്തത്. 100 കോടി രൂപ നിക്ഷേപകർക്കു നൽകാനുണ്ടെന്നു പറയുമ്പോൾ 100 കോടിയിലധികം പിരിഞ്ഞു കിട്ടാനുണ്ടെന്നാണു ബാങ്ക് വിശദീകരണം. ഈട് നൽകിയ സ്ഥലമടക്കം വിൽക്കാൻ സർക്കാർ അനുമതി തേടിയിരിക്കുകയാണെന്നും പറയുന്നു. ക്രമക്കേടുകൾക്കു കൂട്ടുനിന്നതായി സഹകരണ വകുപ്പിന്റെ അന്വേഷണത്തിൽ കണ്ടെത്തിയ ഭരണസമിതി 33.33 കോടി രൂപ പിഴ അടയ്ക്കണമെന്ന് ഉത്തരവുണ്ട്.
സർക്കാർ അനുമതിയില്ലാതെ 12 താൽക്കാലിക ജീവനക്കാരും 8 കലക്‌ഷൻ ഏജന്റുമാരും ജോലി ചെയ്യുന്നുണ്ട്. 65.86 കോടി രൂപ നഷ്ടത്തിൽ നിൽക്കുമ്പോഴും ലക്ഷങ്ങൾ മുടക്കി ബാങ്ക് നവീകരണം നടത്തിയെന്നും ഉദ്യോഗസ്ഥർക്കായി വാഹനങ്ങൾ വാങ്ങിയെന്നും ആക്ഷേപമുയർന്നിരുന്നു.
