പെരുമ്പാവൂർ: ഒന്നരക്കിലോ കഞ്ചാവുമായി രണ്ടുപേർ പിടിയിൽ. ആസാം നൗഗവ് ജൂറിയ സ്വദേശി റൂഹുൽ അമീൻ (44), ബീഹാർ വെസ്റ്റ് ചമ്പാരൻ സ്വദേശി സുരേന്ദ്ര പട്ടേൽ (56) എന്നിവരെയാണ് പെരുമ്പാവൂർ പോലീസ് പിടികൂടിയത്. ഒക്കൽ കാരിക്കോട് ഭാഗത്ത് വീട് വാടകയ്ക്ക് എടുത്തായിരുന്നു മയക്ക്മരുന്ന് വ്യാപാരം. മുറിക്കകത്ത് പ്രത്യേക അറയിലാണ് കഞ്ചാവ് സൂക്ഷിച്ചിരുന്നത്.
ആസാമിൽ നിന്നും തീവണ്ടി മാർഗമാണ് കഞ്ചാവ് എത്തിച്ചിരുന്നത്. ചെറിയ പൊതികളാക്കി രണ്ടായിരം രൂപയ്ക്കാണ് വിൽപ്പന. ഇതര സംസ്ഥാന തൊഴിലാളികൾക്കിടയിലും മലയാളികളായ യുവാക്കൾക്കിടയിലും ആണ് ഇവർ വില്പന നടത്തിവന്നിരുന്നത്. പോലീസിന്റെ നിരീക്ഷണത്തിലായിരുന്നു പ്രതികൾ.
എ.എസ്.പി മോഹിത് റാവത്ത് ഇൻസ്പെക്ടർ കെ.എം.രാജേഷ്, എസ്.ഐമാരായ വി.വിദ്യ, ഒ.എ.രാധാകൃഷ്ണൻ എ.എസ്.ഐ പി.എ.അബ്ദുൽ മനാഫ് സീനിയർ സി പി ഒ മാരായ ടി.എൻ.മനോജ് കുമാർ ടി.എ.അഫ്സൽ, ബെന്നി ഐസക് എന്നിവരാണ് പ്രത്യേക അന്വേഷണ സംഘത്തിലുണ്ടായിരുന്നത്.
