അങ്കമാലി: കറുകുറ്റിയിലെ ന്യൂ ഇയർ കുറീസ് ധനകാര്യ സ്ഥാപനത്തിൽ ഉണ്ടായ വൻ തീപിടുത്തത്തിൽ ഒരു മരണം. കരയാംപറമ്പ് സ്വദേശി പുത്തൻപുരയിൽ വീട്ടിൽ ബാബു (60)ആണ് മരിച്ചത്. സ്ഥാപനങ്ങൾക്ക് ട്രേഡ് മാർക്ക് സംബന്ധമായ വർക്കുകൾ ചെയ്തു കൊടുക്കുന്ന ആളായിരുന്നു ഇയാൾ.ട്രേഡ് മാർക്ക് ആയി ബന്ധപ്പെട്ട കാര്യങ്ങൾക്കായാണ് ബാബു വെള്ളിയാഴ്ച ഉച്ച കഴിഞ്ഞ് സ്ഥാപനത്തിലെത്തിയത്. മൃതദേഹം അങ്കമാലി താലൂക്ക് ആശുപത്രിയിലേക്ക് മാറ്റി.
മണിക്കൂറുകൾ നീണ്ട പ്രയത്‌നത്തിനൊടുവിൽ 20ലേറെ ഫയർ എൻജിനുകൾ എത്തിയാണ് അഗ്‌നിബാധയ്ക്ക് ശമനമുണ്ടാക്കിയത്. വെള്ളിയാഴ്ച വൈകിട്ട് നാലുമണിയോടെയാണ് സ്ഥാപനത്തിൽ തീപിടുത്തം ഉണ്ടായത്. ശനിയാഴ്ച പുലർച്ചയോടെയാണ് തീ പൂർണമായും അണക്കാനായത്. കെട്ടിടത്തിനകത്ത് ഒരാൾ കുരുങ്ങിക്കിടക്കുന്നുണ്ടെന്ന് സംശയം നേരത്തെ ഉണ്ടായിരുന്നു. പിന്നീട് തീ അണച്ചശേഷം അകത്തു കയറി പരിശോധിച്ചപ്പോഴാണ് കത്തിക്കരിഞ്ഞ നിലയിൽ ഒരാളുടെ മൃതദേഹം കണ്ടെത്തിയത്.
തീ പിടുത്തത്തിന്റെ കാരണം വ്യക്തമല്ല. സംഭവത്തിൽ ദുരൂഹത നിലനിൽക്കുന്നതായി ആരോപണമുണ്ട്. ഫയർഫോഴ്‌സിന്റെയുംപോലീസിന്റെയും ഉന്നത ഉദ്യോഗസ്ഥർ ഇന്ന് സ്ഥലം സന്ദർശിച്ച് സ്ഥിതിഗതികൾ വിലയിരുത്തും.
