കാലടി: നവരാത്രിക്ക് ശേഷം കാലടി സന്ദർശിക്കുമെന്ന് ശൃംഗേരി മഠം നിയുക്ത മഠാധിപതി ശ്രീ ശ്രീ വിധുശേഖര ഭാരതി സ്വാമികൾ പറഞ്ഞു. കാലടി ശ്രീശങ്കര സങ്കേത് ഫൗണ്ടേഷൻ ഭാരവാഹികൾ കാലടി ആദിശങ്കര ജന്മഭൂമി ക്ഷേത്രത്തിൽ ഏപ്രിൽ 17 മുതൽ 21 വരെ നടത്തുന്ന പൂർണ്ണ ആരതിക്കും മുതലക്കടവ് സ്നാനത്തിനും സ്വാമികളെ ക്ഷണിക്കാൻ ചെന്നപ്പോഴാണ് കാലടി സന്ദർശിക്കാൻ വരുന്ന കാര്യം പറഞ്ഞത്. പൂർണ്ണ ആരതിക്കും മുതലക്കടവ് സ്നാനത്തിനും എല്ലാവിധ പിന്തുണയും ഉണ്ടാകുമെന്നും സ്വാമികൾ പറഞ്ഞു.
ട്രസ്റ്റ് ചെയർമാൻ ടി.എസ് ബൈജു സ്വാമിക്ക് ഒരടിയുള്ള ഒരു ഗ്രാം തങ്കത്തിൽ തീർത്ത ശ്രീ ശങ്കരാചാര്യരുടെ പ്രതിമ സമർപ്പിച്ചു. ആദിശങ്കര ജന്മഭൂമി ക്ഷേത്രം മുൻ മാനേജർ പ്രൊഫ. എ സുബ്രഹ്മണ്യഅയ്യർ ആഘോഷ സമിതി ഭാരവാഹികളായ ഡോ. പ്രശാന്ത്, ദേവി നായർ, ബിജു വരപ്പുറത്ത് തുടങ്ങിയവർ സന്നിഹിതരായിരുന്നു. ഭാരവാഹികൾക്ക് സ്വാമികൾ പ്രസാദം നൽകി അനുഗ്രഹിക്കുകയും ചെയ്തു.
