കാലടി-മറ്റൂര് ജംഗ്ഷനുകളിലെ ഗതാഗത കുരുക്ക് പരിഹരിക്കാന് സ്ഥിരമായ സംവിധാനങ്ങള് ഏര്പ്പെടുത്താന് 1.5 കോടി രൂപ അനുവദിച്ചതായി അങ്കമാലി എം.എല്.എ റോജി എം. ജോണ് അറിയിച്ചു. കേരള റോഡ് സേഫ്റ്റി അതോറിറ്റിയുടെ ഫണ്ടില് നിന്നുമാണ് തുക അനുവദിച്ചിരിക്കുന്നത്. മറ്റൂര് ജംഗ്ഷന് സമീപം പാലച്ചുവട് മുതല് കാലടി പാലത്തിന് ശേഷം താന്നിപ്പുഴ വരെ സ്ഥിരമായ മീഡിയനും അനബന്ധ സൗകര്യങ്ങളും നിര്മ്മിക്കുവാനാണ് തുക അനുവദിച്ചിരിക്കുന്നത്.
കാലടിയിലെ ഗതാഗത കുരുക്ക് സംബന്ധിച്ച് ചര്ച്ച നടത്താന് ഗതാഗത വകുപ്പ് മന്ത്രി കെ.ബി ഗണേഷ് കുമാറിന്റെ അദ്ധ്യക്ഷതയില് എം.എല്.എയുടേയും പഞ്ചായത്ത് ജനപ്രതിനിധികളുടേയും കാലടി റെസിഡന്റ്സ് അസ്സോസ്സിയേഷന് ഭാരവാഹികളുടേയും ഉദ്യോഗസ്ഥരുടേയും യോഗം ചേര്ന്നിരുന്നു. ഇതെ തുടര്ന്ന് സ്പോണ്സര്ഷിപ്പിലൂടെ താല്ക്കാലിക മീഡിയനുകള് സ്ഥാപിച്ചെങ്കിലും വാഹനങ്ങല് ഇടിച്ച് ഇത് തകര്ന്ന് പോയിരുന്നു.
പിന്നീട് മന്ത്രിയുടെ സാന്നിധ്യത്തില് എറണാകുളത്ത് വച്ച് എം.എല്.എയും മറ്റ് ജനപ്രതിനിധികളും റസിഡന്റ്സ് അസ്സോസ്സിയേഷന് ഭരവാഹികളും യോഗം ചേരുകയും സ്ഥിരമായ മീഡിയനുകള് സ്ഥാപിക്കാന് 1.5 കോടി രൂപ എങ്കിലും ആവശ്യമായി വരുമെന്ന് പി.ഡബ്ലു.ഡി ഉദ്യോഗസ്ഥര് അറിയിച്ചു. ഇതിന്റെ അടിസ്ഥാനത്തില് വിശദമായ ഡി.പി.ആര് തയ്യാറാക്കി റോഡ് സേഫ്റ്റി അതോറിറ്റിക്ക് സമര്പ്പിച്ചു. ഇതിന് ഭരണാനുമതി നല്കാന് ഗതാഗത മന്ത്രി നിര്ദ്ദേശിക്കുകയായിരുന്നു.
കാലടിയിലെ പുതിയ സമാന്തര പാലത്തിന്റെ നിര്മ്മാണം അന്തിമഘട്ടത്തിലാണ്. മെയ് അവസാനത്തോടെ പാലം പണി പൂര്ത്തീകരിക്കാന് കഴിയുമെന്നാണ് പി.ഡബ്ലു.ഡി എഞ്ചിനീയര്മാര് അറിയിച്ചിരിക്കുന്നത്. ഇതോടനുബന്ധിച്ച് ഇപ്പോള് ലഭ്യമായ തുക വിനിയോഗിച്ച് ക്യത്യമായ ലൈന് ട്രാഫിക് ഉറപ്പ് വരുത്തി കാലടിയിലേയും മറ്റൂരിലേയും ഗതാഗത കുരുക്കിന് ഒരു പരിധി വരെ പരിഹാരം കാണാന് കഴിയുമെന്ന് റോജി എം. ജോണ് എം.എല്.എ പറഞ്ഞൂ.
