കാഞ്ഞൂർ: കാഞ്ഞൂർ നാട്ടുപൊലിമ നാടൻപാട്ട് സംഘത്തിലെ അംഗമായിരുന്ന അമ്പാടിയുടെ പന്ത്രണ്ടാമത് ചരമ വാർഷികത്തോടനുബന്ധിച്ച് സംഘടിപ്പിച്ച ഓർമ്മ കൂട്ടായ്മയിൽ വച്ച് ഈ വർഷത്തെ കാഞ്ഞൂർ നാട്ടുപൊലിമ പുരസ്കാരങ്ങൾ പ്രഖ്യാപിച്ചു. പന്ത്രണ്ടാമത് അമ്പാടി സ്മാരക ഫോക്ലോർ അവാർഡിനായി പാരമ്പര്യ നാടോടി കലയായ ഗരുഡൻ പറവ കലാകാരൻ എം കെ പ്രദീപനെയും, മൂന്നാമത് നാട്ടുകല പുരസ്കാരത്തിനായി പ്രശസ്ത ഫോക്ലോറിസ്റ്റ് ഗിരീഷ് ആമ്പ്രയെയും, ഇ കെ ബിനു ഓർമ്മ പുരസ്കാരത്തിനായി അഭിനേത്രിയും നർത്തകിയുമായ ആര്യ സലീമിനെയും തെരഞ്ഞെടുത്തു. ചലച്ചിത്ര ടിവി താരം മനോജ് ഗിന്നസ് അവാർഡുകളുടെ പ്രഖ്യാപനം നടത്തി.
ഓഗസ്റ്റ് 23ന് കാഞ്ഞൂർ എസ് എൻ ഡി പി ഓഡിറ്റോറിയത്തിൽ വച്ച് സംഘടിപ്പിക്കുന്ന കാഞ്ഞൂർ നാട്ടുപൊലിമയുടെ 22 മത് വാർഷികാഘോഷം, തിമിർപ്പ്-25 വേദിയിൽ വച്ച് പുരസ്കാരങ്ങളും പ്രശസ്തിപത്രവും സമ്മാനിക്കും. തോട്ടുമുഖം ശ്രീനാരായണ സേവിക സമാജത്തിൽ വച്ച് സംഘടിപ്പിച്ച ഓർമ്മ കൂട്ടായ്മ കാഞ്ഞൂർ സർവീസ് സഹകരണ ബാങ്ക് പ്രസിഡൻറ് ആൻസി ജിജോ ഉദ്ഘാടനം നിർവഹിച്ചു. നാട്ടുപൊലിമ പ്രസിഡൻറ് ലൈജു ഇ കെ, ഡയറക്ടർ പ്രശാന്ത് പങ്കൻ, സെക്രട്ടറി ആഷിക് അനിൽകുമാർ, ട്രഷറർ മണി ജി കെ, കോഡിനേറ്റർമാരായ മഹേഷ് വിക്രമൻ, സുദീപ് സിപി, അഖിൽ രാജ് എന്നിവർ സംസാരിച്ചു. ഓർമ്മ കൂട്ടായ്മയുടെ ഭാഗമായി നാടൻ പാട്ടുകൾ, സ്നേഹവിരുന്ന് എന്നിവയും ഉണ്ടായിരുന്നു
