തിരുവനന്തപുരം ∙ മുഖ്യമന്ത്രിയുടെ മകൾ ടി.വീണ സ്വകാര്യ കരിമണൽ കമ്പനിയിൽനിന്നു പണം കൈപ്പറ്റിയെന്ന ആദായനികുതി വകുപ്പ് ഇന്ററിം സെറ്റിൽമെന്റ് ബോർഡിന്റെ കണ്ടെത്തൽ പരിശോധിക്കുമെന്നു ഗവർണർ ആരിഫ് മുഹമ്മദ് ഖാൻ വ്യക്തമാക്കി. മാധ്യമവാർത്തകളിൽനിന്നുള്ള അറിവേ ഇക്കാര്യത്തിലുള്ളൂ. അറിഞ്ഞിടത്തോളം ഗൗരവമുള്ള കാര്യമാണ്. ആരോപണങ്ങളല്ല, ആദായനികുതി വകുപ്പിന്റെ കണ്ടെത്തലുകളാണു പുറത്തു വന്നതെന്നാണു വിവരം. എന്താണു സംഭവിച്ചതെന്നു വ്യക്തമായി മനസ്സിലാക്കണം. മുഖ്യമന്ത്രിയിൽ നിന്നു വിശദീകരണം തേടേണ്ടതുണ്ടോയെന്ന് അതിനുശേഷം തീരുമാനിക്കുമെന്നും പറഞ്ഞു.
അതേസമയം, രാജ്ഭവനിൽ ഇതു സംബന്ധിച്ച് ഇതുവരെ പരാതികളൊന്നും ലഭിച്ചിട്ടില്ല. പരാതി ലഭിച്ചാൽ അതിന്റെ അടിസ്ഥാനത്തിലാകും മുഖ്യമന്ത്രിയോടും സർക്കാരിനോടും വിശദീകരണം തേടുകയെന്നു സൂചനയുണ്ട്. സ്വാതന്ത്ര്യദിനത്തോടനുബന്ധിച്ചു നാളെ വൈകിട്ടു നടത്തുന്ന വിരുന്നിനു മുഖ്യമന്ത്രിയെയും മന്ത്രിമാരെയും ഗവർണർ ക്ഷണിച്ചിട്ടുണ്ട്.
