സാല്‍വദോര്‍: പരിശീലനം നടത്തുന്നതിനിടെ ബ്രസീല്‍ ഫുട്‌ബോള്‍താരം കുഴഞ്ഞുവീണ് മരിച്ചു. ഡിയോണ്‍ എന്നപേരിലറിയപ്പെടുന്ന ഹോസെ ആല്‍ഡിയാന്‍ ഒലിവെയ്‌റ നെറ്റോയാണ് മരിച്ചത്. ഹൃദയാഘാതമാണ് മരണത്തിനുകാരണം.
ബഹിയ ഡെ ഫെയ്‌റ എന്ന ഫുട്‌ബോള്‍ ക്ലബ്ബിന്റെ മുന്നേറ്റ താരമായ ഡിയോണ്‍ ബുധനാഴ്ച്ച ഉച്ചയ്ക്ക് ശേഷം നടന്ന ഫുട്‌ബോള്‍ പരിശീലനത്തിനിടെയാണ് കുഴഞ്ഞുവീണത്. സാല്‍വദോറില്‍ നിന്ന് 100 കിലോമീറ്റര്‍ അകലെയുള്ള ഫെയ്‌റ ഡെ സന്റാനയിലാണ് പരിശീലനം നടന്നത്.
36 കാരനായ ഡിയോണിനെ ടീം ഡോക്ടര്‍ പരിശോധിച്ചെങ്കിലും ജീവന്‍ രക്ഷിക്കാനായില്ല. ഹൃദയാഘാതം മൂലമാണ് മരണം സംഭവിച്ചതെന്ന് ബ്രസീല്‍ ഫുട്‌ബോള്‍ ഫെഡറേഷന്‍ ഔദ്യോഗികമായി സ്ഥിരീകരിച്ചു. 2023-ല്‍ ടീമിനായി 23 മത്സരം കളിച്ച താരം അഞ്ച് ഗോളും ഒരു അസിസ്റ്റും നേടി. ശനിയാഴ്ചയാണ് താരം അവസാനമായി ടീമിനായി ബൂട്ടുകെട്ടിയത്. മത്സരത്തില്‍ ബഹിയ ഡെ ഫെയ്‌റ വിജയിക്കുകയും ചെയ്തു.
