കളമശേരി: കളമശേരി ലോറി താവളത്തില്‍ വെച്ച് രണ്ട് യുവാക്കളുടെ കൈയ്യും കാലും തല്ലിയൊടിച്ച മൂന്ന് പേരെ കളമശേരി പൊലീസ് അറസ്റ്റ് ചെയ്തു. തിരുവനന്തപുരം സ്വദേശികളായ നെടുമങ്ങാട്, ചുള്ളിമാനൂര്‍, വി വി ഹൌസിൽ വിനോദ് വി (37), കുന്നത്തുകള്‍, എല്ലുവില, വെളിതരകോണം, അഭയാഭവന്‍ വീട്ടില്‍, ഷൈന്‍കുമാര്‍ (42), നെയ്യാറ്റിങ്കര, കുന്നത്തുകള്‍, കരകോണം, ബ്ലാംകുളം, പുത്തന്‍വീട്ടില്‍, രാസലയന്‍ വീട്ടില്‍ രാജന്‍ ആര്‍ (49) എന്നിവരെയാണ് കളമശേരി പൊലീസ് അറസ്റ്റ് ചെയ്തത്. ലോറി ഡ്രൈവര്‍ ആയ തിരുവനന്തപുരം സ്വദേശി ഷൈജു എസ്, ഇയാളുടെ സുഹൃത്ത് സത്യകുമാര്‍ എന്നിവര്‍ക്കാണ് മര്‍ദനം ഏറ്റത്.
ഇന്നലെ രാത്രിയോടെ കളമശേരി അപ്പോളോ ടയേഴ്സിന് സമീപത്തുള്ള ലോറി താവളത്തില്‍ വെച്ചാണ് കേസിനാസ്പദമായ സംഭവം നടന്നത്. ഷൈജുവും ഇയാളുടെ സുഹൃത്തായ സത്യകുമാറും സംസാരിച്ചു കൊണ്ടിരിക്കെ ലോറി ഡ്രൈവര്‍ മാരായ വിനോദ് വി, ഷൈന്‍കുമാര്‍, രാജന്‍ എന്നിവര്‍ ഷൈജുവിന്‍റെ സുഹൃത്തിനെ അസഭ്യം പറയുകയും, ഇത് ചോദ്യം ചെയ്ത ഷൈജുവിനെ യാതൊരു പ്രകോപനവുമില്ലാതെ അതിക്രൂരമായി മര്‍ദിക്കുകയും, ഇത് തടയുവാനെത്തിയ ഷൈജുവിന്‍റെ സുഹൃത്തായ സത്യകുമാറിനെ മൂന്നു പേരും ചേര്‍ന്ന് ചവിട്ടി നിലത്തിടുകയും ലോറിയില്‍ ഇരുന്ന ജാക്കി ലിവര്‍ കൊണ്ട് കൈയ്യും കാലും തല്ലിയൊടിക്കുകയായിരുന്നു. മര്‍ദ്ദനത്തില്‍ ഷൈജുവിന്‍റെ കൈക്കും സത്യകുമാറിന്‍റെ കാലിനും ഒടിവുണ്ട്. ഇരുവരും കളമശേരി മെഡിക്കല്‍ കോളെജ് ആശുപത്രിയില്‍ ചികിത്സയിലാണ്. ഷൈജുവിന്‍റെ പരാതിയില്‍ കേസ് രജിസ്റ്റര്‍ ചെയ്ത കളമശേരി പൊലീസ് കളമശേരി പ്രീമിയര്‍ ഭാഗത്ത് വെച്ച് പ്രതികളെ കസ്റ്റ്ഡിയില്‍ എടുത്തു. കളമശേരി പോലീസ് ഇന്‍സ്പെക്ടര്‍ വിബിന്‍ ദാസിന്‍റെ നേതൃത്വത്തില്‍ സബ് ഇന്‍സ്പെക്ടര്‍മാരായ വിനോജ്, അരുണ്‍കുമാര്‍ എസ് സി പി ഒ അനില്‍ കുമാര്‍, സി പി ഒ മാരായ ശ്രീനാഥ്, നിഷാദ്, ഷാബിന്‍ എന്നിവര്‍ ഉള്‍പ്പെട്ട പൊലീസ് സംഘമാണ് പ്രതികളെ കസ്റ്റഡിയില്‍ എടുത്തത്. കോടതിയിൽ ഹാജരാക്കിയ പ്രതികളെ റിമാണ്ട് ചെയ്തു.
