പെരുമ്പാവൂർ: പെരുമ്പാവൂരിൽ വീണ്ടും പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടു പോകാൻ ശ്രമം. പെരുമ്പാവൂർ, വെങ്ങോല, പൂണൂരിൽ നിന്ന് അതിഥി തൊഴിലാളികളുടെ രണ്ടര വയസ്സ് പ്രായം വരുന്ന പെൺകുട്ടിയെയാണ് തട്ടിക്കൊണ്ടു പോകാൻ ശ്രമിച്ചത്. സംഭവത്തിൽ പ്രതിയായ ഒഡീഷ ഫുൾവാനി സ്വദേശി സിമാചൽ ബിഷോയിയെ നാട്ടുകാർ പിടികൂടി പെരുമ്പാവൂർ പോലീസിൽ ഏൽപ്പിച്ചു.
പതിനാറാം തീയതി തിങ്കളാഴ്ച പകൽ 12 മണിക്കാണ് സംഭവം. കുട്ടിയുടെ അച്ഛനും, അമ്മയും, മുത്തച്ഛനും, മുത്തശ്ശിയും ജോലിക്ക് പോയ സമയത്താണ് പ്രതി കുട്ടിയെ തട്ടിക്കൊണ്ടു പോകാൻ ശ്രമിച്ചത്. സഹോദരങ്ങളായ മറ്റ് രണ്ട് കുട്ടികളോട് ഒന്നിച്ച് രണ്ടര വയസ്സുകാരി കളിച്ചുകൊണ്ടിരിക്കുന്നതിനിടയാണ് സംഭവം. പ്രതി കുട്ടിയെ എടുത്ത് തട്ടിക്കൊണ്ടു പോകാനായി ശ്രമിച്ചതോടെ മറ്റു കുട്ടികൾ ബഹളം വച്ചു. ഇതോടെ കുട്ടിയെ നിലത്ത് നിർത്തിയ പ്രതി, കുട്ടിയുടെ കൈവശം ഇരുന്ന മൊബൈൽ ഫോൺ തട്ടിപ്പറിച്ചെടുത്ത് ഓടുകയായിരുന്നു. ഓടിക്കൂടി പ്രദേശവാസികൾ ഇയാളെ തടഞ്ഞുവച്ചു. പിന്നീട് പെരുമ്പാവൂർ പോലീസ് എത്തി കസ്റ്റഡിയിൽ എടുത്തു. പ്രതിയെ പിന്നീട് പെരുമ്പാവൂർ ജുഡീഷ്യൽ ഒന്നാം ക്ലാസ് മജിസ്ട്രേട്ട് കോടതിയിൽ ഹാജരാക്കി.
കഴിഞ്ഞ രണ്ടാഴ്ചയ്ക്കിടെ പെരുമ്പാവൂർ മേഖലയിൽ നിന്ന് കുട്ടികളെ തട്ടിക്കൊണ്ടു പോകാൻ ശ്രമം നടത്തിയ രണ്ടാമത്തെ സംഭവമാണ് ഇത്. രണ്ടിടത്തും നാട്ടുകാരുടെ സമയോചിതമായ ഇടപെടൽ കൊണ്ടാണ് പ്രതികളെ പിടികൂടാൻ സാധിച്ചത്. ഇത്തരം സംഭവങ്ങൾ അടിക്കടി ഉണ്ടാകുന്നതോടെ മലയാളികളായ പ്രദേശവാസികൾ വരെ ആശങ്കയിലാണ്.
