കാലടി: വർഷങ്ങളോളം തലച്ചുമടുമായി മലയാറ്റൂർ കുരിശുമുടിയിലേക്ക് വസ്തുക്കൾ എത്തിച്ചിരുന്ന മലയാറ്റൂർ സ്വദേശിനി മറിയം (86) നിര്യാതയായി. കഴിഞ്ഞ 70 വർഷമായി കുരിശുമുടിയിലേക്ക് മറിയം തലച്ചുമടായി സാധനങ്ങൾ എത്തിക്കുന്നുണ്ട്. പാറക്കെട്ടുകളും ഉരുളൻ കല്ലുകളും നിറഞ്ഞ വഴിയിലൂടെ വടി കുത്തിപ്പിടിച്ചു മറിയത്തിന്റെ യാത്ര തീർഥാടകർ അതിശയമായിരുന്നു.
പന്ത്രണ്ടാം വയസിൽ അമ്മയുടെ സഹായിയായി മലകയറിതുടങ്ങിയതാണ് മറിയം. കുരിശുമുടി പള്ളിയുടെ പുനർ നിർമാണത്തിനുള്ള മണലും സിമന്റുമാണ് അന്ന് ചുമന്നത്. വർഷങ്ങൾക്കിപ്പുറവും മറിയം മലകയറിയിരുന്നു. ദിവസത്തിൽ മൂന്നും നാലും തവണ മലകയറിയിരുന്നത് പ്രായമായതോടെ ഒരു തവണയാക്കി കുറച്ചുവെന്ന് മാത്രം. പൊന്നിൻ കുരിശ് മുത്തപ്പോ പൊന്മല കയറ്റം എന്നുരുവിട്ടാൽ ചുമടിന് ഭാരം അറിയില്ലെന്നാണ് മറിയം പറയുന്നത്.
മലമുകളിലെ ചുമടു കയറ്റം കഴിഞ്ഞ് തൊഴിലുറപ്പ് തൊഴിലിനും കുടുംബശ്രീയുടെ പണികൾക്കും പോകുമായിരുന്നു. എന്നാൽ കഴിഞ്ഞ 3 വർഷത്തോളമായി മറിയം പ്രായാത്തിന്റെ അവശത മൂലം മല കയറിയിരുന്നില്ല. മലയാറ്റൂർ പള്ളി മറിയത്തെ ആദരിക്കുകയും ചെയ്തിരുന്നു. സംസ്‌കാരം ശനിയാഴ്ച രാവിലെ 10 ന് മലയാറ്റൂർ, വിമലഗിരി മേരി ഇമ്മാക്കുലേറ്റ് പള്ളിയിൽ നടക്കും.
