കാഞ്ഞൂർ: കാഞ്ഞൂർ ആറങ്കാവിലെ ഐഎൻടിയുസി മണൽത്തൊഴിലാളി യൂണിയന്റെ ഓഫീസ് പുതുമോടിയോടെ അങ്കണവാടിയായി. അങ്കണവാടിക്കായി നിലവിലുള്ള പാർട്ടി ഓഫീസ് കെട്ടിടത്തിനൊപ്പം, വിശാലായ ഹാളും ശുചിമുറികളും അനുബന്ധ സൗകര്യങ്ങളുമൊരുക്കിയാണ് ഗ്രാമപഞ്ചായത്തിനു കൈമാറിയത്. സമീപത്തെ ഭൂമി വാങ്ങിയാണ് കെട്ടിടം വിപുലമാക്കിയത്.
നേരത്തെ പാർട്ടി ഓഫീസ് നിർമാണത്തിനും യൂണിയൻ പ്രവർത്തനങ്ങൾക്കും നേതൃത്വം നൽകിയ അന്തരിച്ച മുൻ ഗ്രാമപഞ്ചായത്ത് പ്രസിഡന്റ് എം. ഉണ്ണിമേനോന്റെ സ്മാരകമായാണ് അങ്കണവാടി അറിയപ്പെടുക.ഏഴാം വാർഡ് മെമ്പർ സിമി ടിജോയുടെയും യൂണിയൻ ഭാരവാഹികളുടെയും നേതൃത്വത്തിലാണ് കെട്ടിടത്തിന്റെ നവീകരണ ജോലികൾ പൂർത്തിയാക്കിയത്. അങ്കണവാടിക്കു സ്വന്തം കെട്ടിടമൊരുക്കുന്നതിലും വിവിധ സൗകര്യങ്ങൾ സജ്ജമാക്കുന്നതിലും സുമനസുകൾ കൈകോർത്തു.
എം.ഉണ്ണിമേനോന്റെ പത്നി ശകുന്തള മേനോൻ അങ്കണവാടി കെട്ടിടത്തിന്റെ ഉദ്ഘാടനം നിർവഹിച്ചു. ശിലാഫലകം അനാഛാദനവും സമ്മേളനം ഉദ്ഘാടനവും അൻവർ സാദത്ത് എംഎൽഎ നിർവഹിച്ചു. സ്ഥലത്തിന്റെയും കെട്ടിടത്തിന്റെയും ഉടമസ്ഥാവകാശ രേഖകൾ എംഎൽഎയിൽ നിന്നു ഗ്രാമപഞ്ചായത്ത് പ്രസിഡന്റ് പ്രിയ രഘുവും ഐസിഡിഎസ് സൂപ്പർവൈസർ കെ.ഒ. ജെസിയും ചേർന്ന് ഏറ്റുവാങ്ങി. വാർഡ് മെമ്പർ സിമി ടിജോ അധ്യക്ഷത വഹിച്ചു.
ബ്ലോക്ക് പഞ്ചായത്തംഗം കെ.വി. അഭിജിത്ത്, കെ.എൻ കൃഷ്ണകുമാർ, സെബാസ്റ്റ്യൻ പോൾ, കെ.വി. പോളച്ചൻ, എം.ഐ. ദേവസിക്കുട്ടി, പി.ഐ. നാദിർഷാ, ഗ്രേസി ദയാനന്ദൻ, എം.വി. സത്യൻ, ടിജോ വർഗീസ്, പി.വി. തങ്കച്ചൻ, അധ്യാപിക കെ.എസ്. ഷൈലജ, ഷാന്റി ജോസ് തുടങ്ങിയവർ പ്രസംഗിച്ചു. പാർട്ടിയോഫീസ് മറ്റൊരു സ്ഥലത്ത് പ്രവർത്തിക്കും.
