കാഞ്ഞൂര്‍: കാഞ്ഞൂർ ഗ്രാമപഞ്ചായത്ത് ഏഴാം വാര്‍ഡ് എഡിഎസും ആത്മജീവന്‍ ചാരിറ്റബിള്‍ ട്രസ്റ്റും മുത്തൂറ്റ് കാന്‍സര്‍ സെന്ററും സംയുക്തമായി സൗജന്യ സ്തനാര്‍ബുദ നിര്‍ണയ ക്യാമ്പും ബോധവത്കരണ ക്ലാസും നടത്തി. കിഴക്കുംഭാഗം ഉണ്ണിമിശിഹാ പള്ളി പാരിഷ് ഹാളില്‍ നടന്ന ക്യാന്പിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ നിർവഹിച്ചു.
ഗ്രാമപഞ്ചായത്ത് വൈസ് പ്രസിഡന്റ് സിമി ടിജോ അധ്യക്ഷത വഹിച്ചു. കിഴക്കുംഭാഗം പള്ളി വികാരി ഫാ. സുഭാഷ് മാളിയേക്കല്‍, ആത്മജീവന്‍ ചാരിറ്റബിള്‍ ട്രസ്റ്റ് പ്രസിഡന്റ് ജോജോ മനയംപിള്ളി, മുത്തൂറ്റ് കാൻസർ സെന്‍റർ കോ ഓർഡിനേറ്റർ റിജു, സിഡിഎസ് ചെയര്‍പേഴ്‌സണ്‍ അഖില സജീവന്‍, ദീപ ബിജൻ എന്നിവർ പ്രസംഗിച്ചു. സ്ത്രീകളില്‍ ഉണ്ടായേക്കാവുന്ന കാന്‍സര്‍ തിരിച്ചറിയുന്നതിനു സഹായിക്കുന്ന ഏറ്റവും അത്യാധുനിക ടെസ്റ്റിംഗ് മെഷീൻ എത്തിച്ചായിരുന്നു പരിശോധന. സ്ത്രീകളിലെ കാന്‍സര്‍ സാധ്യതകളെക്കുറിച്ച് ഓഡിയോ, വിഷ്വല്‍ പ്രോഗ്രാമിന്റെ സഹായത്തോടെ ബോധവത്കരണ ക്ലാസും ഉണ്ടായിരുന്നു.
