കാലടി: കളഞ്ഞ് കിട്ടിയ സ്വർണമാല ഉടമയ്ക്ക് നൽകി മാതൃകയായി ഹിരൺ. തിരുവൈരാണിക്കുളം സ്വദേശി ശ്രീകുമാറിന്റെ 3 പവൻ തൂക്കം വരുന്ന മാലയാണ് കളഞ്ഞ് പോയത്. ഞായറാഴ്ച്ച വൈകീട്ട് മാറമ്പിളളിയിൽ പച്ചക്കറി വാങ്ങാൻ പോയതായിരുന്നു ശ്രീകുമാർ. പച്ചക്കറി വാങ്ങുന്നതിനിടയിൽ മാല പൊട്ടി വീഴുകയായിരുന്നു. വീട്ടിലെത്തിയപ്പോഴാണ് മാല നഷ്ടപ്പെട്ട വിവരം അറിയുന്നത്. തുടർന്ന് പല സ്ഥലങ്ങളിൽ അന്വേഷണം നടത്തിയെങ്കിലും മാല കിട്ടിയില്ല. മാറമ്പിളളിയിലെ പച്ചക്കറി കടയിൽ പച്ചക്കറി വാങ്ങുന്നതിനിടയിലാണ് കാഞ്ഞൂർ തിരുനാരയണപുരം സ്വദേശി ഹിരണിന് കടയുടെ മുൻപിൽ കിടന്ന് മാല കിട്ടുന്നത്. സ്വർണം പൂശിയ മാലയെന്നാണ് ആദ്യം കരുതിയത്. തുടർന്നാണ് സ്വർണമാലയാണ് ഇതെന്ന് മനസിലായത്. സമീപത്തുണ്ടായിരുന്ന ഹിരണിന്റെ ബന്ധുവായ പോലീസുകാരനെ മാല ഏൽപ്പിച്ചു. പിന്നീട് ശ്രീകുമാറിന്റെ മാലയാണ് ഇതെന്ന് അറിയുകയും, ഹിരൺ മാല ശ്രീകുമാറിന് കൈാമാറുകയും ചെയ്തു.
