കാലടി: ഇറ്റലിയിൽ ജോലി വാഗ്ദാനം ചെയ്ത് പണം തട്ടിയ കേസിൽ ഒരാളെ അറസ്റ്റ് ചെയ്തു. അങ്കമാലി എസ് എൻ ഡി പി ജംഗ്ഷൻ ഭാഗത്ത് കുന്നപ്പിള്ളി വീട്ടിൽ ബിനോയ് (44) നെയാണ് കാലടി പോലീസ് അറസ്റ്റ് ചെയ്തത്. 2021 മാർച്ച് മുതൽ 2022 നവംബർ വരെയുള്ള വിവിധ കാലഘട്ടങ്ങളിലായി കാലടി നടുവട്ടം സ്വദേശിനിയായ യുവതിയിൽ നിന്നും എട്ടുലക്ഷത്തി അമ്പതിനായിരം രൂപയാണ് ബിനോയിയും മറ്റ് മൂന്ന് പേരും കൂടി തട്ടിയെടുത്തത്. ഇറ്റലിയിൽ ഹോം നേഴ്സ് ജോലി ശരിയാക്കി കൊടുക്കാം എന്ന് പറഞ്ഞാണ് പണം വാങ്ങിയിരുന്നത്. പിന്നീട് ജോലി ലഭിക്കാതെ വന്നതോടെ യുവതി പോലീസിൽ പരാതിപ്പെടുകയായിരുന്നു. അന്വേഷണസംഘത്തിൽ ഇൻസ്പെക്ടർ അനിൽകുമാർ റ്റി മേപ്പിള്ളി, എസ് ഐ മാരായ ശ്യാം, അജ്മൽ, എ എസ് ഐ സെബാസ്റ്റ്യൻ, സിപിഒ മാരായ നിഖിൽ, ഇബ്രാഹിം, അനൂപ് എന്നിവരാണ് ഉണ്ടായിരുന്നത്.
