കാലടി:ഇന്നൊവേഷൻ ആൻഡ് എന്റർപ്രണർഷിപ്പ് ഡെവലപ്മെന്റ് സെന്ററിന്റെ നേതൃത്വത്തിൽ ക്ലസ്റ്റർ മീറ്റിങ്ങ് കാലടി ആദിശങ്കര എൻജിനീയറിങ്ങ് കോളേജിൽ നടന്നു. പവിഴം ഹെൽത്തിയർ ഡയറ്റ് പ്രൈവറ്റ് ലിമിറ്റഡ് കമ്പനി എംഡി എൻ. പി ആന്റണി ഉദ്ഘാടനം ചെയ്തു. ആദിശങ്കര മാനേജിങ്ങ് ട്രസ്റ്റി കെ. ആനന്ദ് അധ്യക്ഷത വഹിച്ചു. പ്രിൻസിപ്പാൾ ഡോ. എം. എസ് മുരളി, ഡീൻ ഡോ. കെ. കെ എൽദോസ്, കേരള സ്റ്റാർട്ടപ്പ് മിഷൻ അസിസ്റ്റന്റ് മാനേജർ ബെർജിൻ റസീൽ, പ്രെഫ. അജയ് ബേസിൽ, പ്രെഫ. എൽദോസ് പി സിം തുടങ്ങിയവർ സംസാരിച്ചു.
സംരംഭങ്ങൾ തുടങ്ങുന്നതുമായി ബന്ധപ്പെട്ട് വിവിധ ക്‌ളാസുകളും നടന്നു. കേരളത്തിലെ വിവിധ കോളേജുകളിൽ നിന്നുളള തെരഞ്ഞെടുക്കപ്പെട്ട വിദ്യാർത്ഥികളാണ് മീറ്റിങ്ങിൽ പങ്കെടുത്തത്. ഇന്നൊവേഷൻ ആൻഡ് എന്റർപ്രണർഷിപ്പ് ഡെവലപ്മെന്റ് സെന്റർ കേരള സ്റ്റാർട്ടപ്പ് മിഷൻ ആരംഭിച്ച ഒരു നവീന പദ്ധതിയാണ്, ഇതിലൂടെ വിദ്യാലയങ്ങളിലും ടെക്നിക്കൽ സ്ഥാപനങ്ങളിലും നവീകരണ സംരംഭങ്ങളെയും സംരംഭകത്വത്തെയും പ്രോത്സാഹിപ്പിക്കുകയാണ് ലക്ഷ്യം.
വിദ്യാർത്ഥികളിൽ സാങ്കേതികവിദ്യകളെക്കുറിച്ചുള്ള അറിവ്, പ്രായോഗിക പരിചയം എന്നിവ വളർത്തുന്നതിനുള്ള പദ്ധതികളും നടപ്പാക്കുന്നുണ്ട്. വിവിധ ഇൻകുബേറ്റർ സംവിധാനങ്ങളും, പരിശീലന പരിപാടികളും, മാർഗ്ഗനിർദ്ദേശങ്ങളും, സംരംഭകത്വത്തിനായുള്ള സാമ്പത്തിക സഹായങ്ങളും ഇതിന്റെ ഭാഗമാണ്. ഇന്നൊവേഷൻ ആൻഡ് എന്റർപ്രണർഷിപ്പ് ഡെവലപ്മെന്റ് സെന്ററിലൂടെ വിദ്യാർത്ഥികൾക്ക് സ്വന്തമായ സ്റ്റാർട്ടപ്പുകൾ തുടങ്ങാനും, സ്വതന്ത്ര സംരംഭകരാകാനും കൂടുതൽ പിന്തുണയും മാർഗ്ഗനിർദ്ദേശവും ലഭ്യമാക്കുന്നു.
