അങ്കമാലി : ശില്പിയും ജാൻ എ മൻ, തല്ലുമാല, മഞ്ഞുമ്മൽ ബോയ്സ്, തെക്ക് വടക്ക് സിനിമകളുടെ സഹ സംവിധായകനുമായ അനിൽ സേവ്യർ (39) അന്തരിച്ചു. ഫുട്ബോൾ കളിക്കിടയിലുണ്ടായ ഹൃദയസ്തംഭനത്തെ തുടർന്ന് ചികിത്സയിലായിരുന്നു. അങ്കമാലി കിടങ്ങൂർ പുളിയേൽപ്പടി വീട്ടിൽ പി.എ. സേവ്യറിന്റെയും അൽഫോൺസയുടെയും മകനാണ്.
ഭാര്യയും ചിത്രകാരിയുമായ അനുപമ ഏലിയാസുമൊത്ത് അങ്കമാലി കേന്ദ്രീകരിച്ച് കലാപരിശീലനം നടത്തിവരുകയായിരുന്നു.തൃപ്പൂണിത്തുറ ആർ.എൽ.വി. കോളേജിൽനിന്ന് ബി.എഫ്.എ. പൂർത്തിയാക്കിയ ശേഷം ഹൈദരാബാദ് കേന്ദ്ര സർവകലാശാലയിൽനിന്ന് ശില്പകലയിൽ എം.എഫ്.എ. ചെയ്തു. കൊച്ചി മുസിരിസ് ബിനാലെയുടെ ഭാഗമായും പ്രവർത്തിച്ചിരുന്നു.
സഹോദരൻ: അജീഷ് സേവ്യർ. മൃതശരീരം മെഡിക്കൽ വിദ്യാർഥികൾക്ക് പഠനത്തിന് നൽകണമെന്ന അനിലിന്റെ ആഗ്രഹം നടപ്പാക്കുമെന്ന് ബന്ധുക്കൾ അറിയിച്ചു. ബുധനാഴ്ച രാവിലെ 11 മുതൽ വസതിയിലും തുടർന്ന് മൂന്നുമണി വരെ നാസ് ഓഡിറ്റോറിയത്തിലും പൊതുദർശനം ഉണ്ടാകും.
